सरपंच अऊ उप सरपंच मिलके गुरूजी ल मरत ले कूटिस, मूड़-गोड़ फूटिस आईस गंभीर चोट

धमतरी, 22 मई 202।। ग्राम पंचायत भोथली स्थित शासकीय प्राथमिक शाला के गुरूजी ल सरपंच अऊ उप सरपंच मिलके मरत ले कूट ददेहे हें जेमा वोकर मूड़-गोड़ फूट गए हे अऊ गंभीर चोट आए हे। मामला के पुलिस म शिकायत करे गए हे। जानबा हे के लईका मन ल मिलइया सूखा राशन म सरपंच अऊ उप सरपंच ह गुरूजी मेर कमीशन के मांग करत रहिन। गुरूजी ह कमीसन देहे ले मना कर दीस इही ह गुरूजी ल भारी पर गे। सरपंच अऊ उप सरपंच ह स्कूल म घुसके गुरूजी के बेदम पिटाई कर दीन। गुरूजी के सिर हाथ-पैर म गंभीर चोट आईस। एकर बद गुरूजी ह अपन संग होए मारपीट के सूचना अपन संगी मन ल दीस। वोकर संगी गुरूजी मन मिलके सरपंच अऊ उप सरपंच के खिलाफ थाना म शिकायत दर्ज कराईन।
पुलिस के बताती कोरोना संक्रमण के चलत स्कूल बंद हे, अइसन म लइका मन ल मिलइया सुखा राशन ल पेक करके ओला लइका मन के घर म देहे जात हे। भोथली शासकीय प्राथमिक शाला स्कूल म गुरूजी अभिषेक सिंह ठाकुर अऊ आन शिक्षक सूखा राशन के पैकिंग करत रहिन। तभे गांव के सरपंच धर्मेंद्र दीवान, उप-सरपंच क्रांति चंद्राकर, राकेश दीवान अऊ ऊंखर संग कुछ अऊ मनखे स्कूल दमक गें। ये बेरा म सरपंच अऊ उप सरपंच सूखा राशन म कमीशन काबर नइ देवत हस रे बोलके शिक्षक अभिषेक सिंह ठाकुर के संग गाली- गलौज करत मारपीट करे लगिन। मारपीट के समय सरपंच अऊ ओखर संगी मन ह स्कूल म रखे टेबल, पंखा अऊ आलमारी ल घलोक तोड़फोड़ करे लगिन। गुरूजी मन ह जब एकर विरोध करिन त सरपंच अऊ ओखर संगी मन गुरूजी ल फेर बेदम पीटीन। आरोपी सरपंच अऊ उप सरपंच ह कमीशन नइ देहे म दुबारा आके पीटे के धमकी दीस। पीड़ित गुरूजी के शिकायत म थाना म सरपंच, उप-सरपंच अऊ ओखर संगी मन के खिलाफ धारा 294, 323, 506, 353, 427 अऊ 34 के तहत अपराध पंजीबद्ध करे गए हे।