भूमिहीन कृषि मजदूर मन ल मिलत हे न्याय

भूमिहीन कृषि मजदूर मन ल साल म 7 हजार रूपिया के आर्थिक सहायता
रायपुर, मुख्यमंत्री श्री भूपेश बघेल के सियानी म छत्तीसगढ़ सरकार सरलग सबो वर्ग के विकास अऊ ओ मन ल आर्थिक रूप ले मजबूत बनाए के दिशा म सरलग कदम बढ़ावत हे। राज्य सरकार कोति ले शुरू करे गए न्याय योजना मन ले गांव वाले मन के आर्थिक सशक्तीकरण होवत हे। इही कड़ी म राज्य के ग्रामीण क्षेत्र मन म रहइया भूमिहीन परिवार ल आर्थिक सहायता प्रदान करे बर छत्तीसगढ़ सरकार ह राजीव गांधी ग्रामीण भूमिहीन कृषि मजदूर न्याय योजना के शुरुआत करे हे।
राजीव गांधी ग्रामीण भूमिहीन कृषि मजदूर न्याय योजना के तहत अभी हाल म प्रदेश के 3 लाख 54 हजार 766 हितग्राही मन ल लाभ मिलत हे। एमां 2 लाख 36 हजार 479 पुरुष, एक लाख 18 हजार 249 महिला अउ 38 ट्रांसजेंडर घलोक सामिल हे। ये योजना ले भूमिहीन परिवार ल आर्थिक संबल मिले हे। राज्य सरकार ह ये वित्तीय साल ले ये योजना के तहत मिलइया राशि 6 हजार ले बढ़ा के 7 हजार रूपिया कर देहे हे।
राजीव गांधी ग्रामीण भूमिहीन कृषि मजदूर न्याय योजना के लाभ भूमिहीन कृषि मजदूर मन के संगे-संग धोबी, नाई, लोहार अऊ पुजारी जइसे काम मन म निर्भर मनखे मन ल घलोक मिलत हे। योजना म एखर से न केवल ओ मन ल परिवार चलाय बर आर्थिक सहयोग मिले हे भलुक वो अपन आन जरूरी घरेलू खरचा ल घलोक अब आसानी ले कर पात हे। योजना म आदिवासी अंचल के सिरहा, गुनिया, आदिवासी के देव स्थल के हाट पहरिया, चालकी, मोहरिया ल घलोक ये योजना के दायरा म सामिल करे गए हे।