रायपुर, मुख्यमंत्री श्री भूपेश बघेल ह आज इहां अपन निवास कार्यालय म भूमकाल स्मृति दिवस के बेरा म अमर शहीद आदिवासी जननायक गुंडाधुर के फोटू म फूल चढ़ा के ओ मन ल नमन करिन। ये बेरा म संसदीय सचिव श्री शिशुपाल सोरी घलोक उपस्थित रहिन ।
मुख्यमंत्री श्री बघेल ह अमर शहीद गुण्डाधुर के सुरता करत कहिन कि आजादी के पहिलिच ले अंग्रेज मन के अत्याचार के खिलाफ छत्तीसगढ़ के आदिवासी क्षेत्र मन म विरोध के अवा उठे हे। ये विरोध ल बुलंद करे म आदिवासी जननायक मन ह महत्वपूर्ण भूमिका निभाए हें अऊ अपन सर्वस्व निछावर कर देहे हें। इही जननायक मन म ले एक अमर शहीद गुंडाधुर के सियानी म सन् 1910 म बस्तर म होए भूमकाल विद्रोह म आदिवासी मन ह जल, जंगल अऊ जमीन बर अंगरेजी हुकूमत के खिलाफ डटके संघर्ष करे रहिन। आदिवासी चेतना के चिन्हारी के रूप म शहीद गुंडाधुर जनमानस म हमेशा जीवित रइहीं। उंखर बलिदान हमेशा आदिवासी मन ल शोषण के विरूद्ध अवाज बुलंद करे के साहस देत रहिही।
उमन कहिन कि अमर शहीद गुंडाधुर ह अपन अधिकार के रक्षा बर आदिवासी जनमानस म जेन अलख जगाए हें, वो हमेशा जलत रइही। उंखर स्मृति म मनाए जात ये भूमकाल दिवस सदा अपन अधिकार मन के रक्षा बर सजग रहे के प्रेरणा देत रहिही।
मुख्यमंत्री श्री भूपेश बघेल ह भूमकाल दिवस म आदिवासी जननायक अमर शहीद गुंडाधुर ल करिन नमन
