शाला भवन मन के मरम्मत अऊ रखरखाव बर पास करे गीस 500 करोड़ रुपिया
मुख्य सचिव ल दीन निर्देश-‘वर्षा ऋतु खतम होतेच शाला मन के मरम्मत के काम तुरंत चालू करे जाए
रायपुर, मुख्यमंत्री श्री भूपेश बघेल ह प्रदेश के कई ठन शाला भवन मन के मरम्मत अऊ रखरखाव बर 500 करोड़ रुपिया के राशि स्वीकृत करे हें। उमन मुख्य सचिव ल ‘सबो शाला मन म निर्विघ्न पढ़ाई सुनिश्चित करे बर वर्षा ऋतु खतम होतेच शाला भवन मन के मरम्मत के काम तुरंत चालू करे के निर्देश देहे हें।
मुख्यमंत्री श्री बघेल ह मुख्य सचिव ल देहे निर्देश म कहे हें कि प्रदेश व्यापी भेंट-मुलाकात अभियान के समय गांव वाले मन, जनप्रतिनिधि मन अऊ मीडिया प्रतिनिधि मन ले शाला भवन मन के दशा के बारे म जानकारी मिले रहिस। लंबा समय ले शाला भवन मन के मरम्मत बर भरपूर राशि के प्रावधान नइ होए ले मरम्मत के काम नइ हो सके हे एखर से पढ़ईया लईका मन के पढ़ाई म बाधा उत्पन्न होवत रहिस।
मुख्यमंत्री ह मुख्य सचिव ल निर्देश दीन कि अवईया शालेय सत्र (जून 2023) सुरू होए के पहिली शाला मन के मरम्मत अऊ रखरखाव बर कम से कम 500 करोड़ रूपिया (पांच सौ करोड़ रुपिया) के प्रावधान करे जाए।
