मुख्यमंत्री कोति ले स्व. श्री साव के स्मृति म हर साल समारोह के आयोजन अऊ कला के क्षेत्र म ऊंखर नाम म पुरस्कार स्थापित करे के घोषणा
मुख्यमंत्री सामिल होइन ‘सुरता खुमान साव के’ कार्यक्रम म: अर्पित करिन विनम्र श्रद्धांजलि
रायपुर, मुख्यमंत्री श्री भूपेश बघेल ह आज रात इहां शहीद स्मारक म आयोजित ‘सुरता खुमान साव के’ कार्यक्रम म सामिल होके स्व. श्री खुमान साव ल विनम्र श्रद्धांजलि अर्पित करिन। ए अवसर म उमन छत्तीसगढ़ के कोना-कोना ले आये लोक कलाकार मन के आग्रह म स्व. श्री खुमान साव के स्मृति ल चिर स्थायी बनाये रखे बर उंखर मूर्ति के स्थापना करे, उंखर स्मृति म हर साल समारोह के आयोजन अऊ कला के क्षेत्र म ऊंखर नाम म पुरस्कार स्थापित करे के घोषणा करिन।
मुख्यमंत्री ह स्वर्गीय श्री खुमान साव के फोटू अऊ अस्थि कलश उपर पुष्प अर्पित करके ओ मन ल श्रद्धांजलि दीन। उमन कहिन कि छत्तीसगढ़ के निर्माण अऊ छत्तीसगढ़िया मनखे मन म स्वाभिमान जगाए म छत्तीसगढ़ के लोक कलाकार मन के अविस्मरणीय योगदान हे। मुख्यमंत्री ह स्व. श्री खुमान साव ले जुड़े संस्मरन मन ल याद करिन। मुख्यमंत्री ह कहिन कि श्री साव के निधन छत्तीसगढ़ के लोककला जगत बर अपूर्णीय क्षति हे।
चंदैनी गोंदा परिवार अउ लोक कलाकार श्रीमती ममता चंद्राकर, श्रीमती सीमा कौशिक, श्रीमती कविता वासनिक, श्री दीपक चंद्राकर संग बहुत अकन कलाकार मन ह स्वरांजलि के माध्यम ले स्व. श्री साव ल श्रद्धांजलि दीन। मुख्यमंत्री ह कहिन कि आज छत्तीसगढ़ियापन ल बढ़ाए के जरूरत हे काबर कि छत्तीसगढ़ियापन म प्रेम अऊ भाईचारा हे, जेकर देश भर नइ पूरा विश्व म जरूरत हे। छत्तीसगढ़ के पहिचान छत्तीसगढ़ के लोक संस्कृति ले हे, जऊन ल हम सब ल मिलके बरकरार रखना होही। कार्यक्रम म उपस्थित गृहमंत्री श्री ताम्रध्वज साहू, नगर निगम रायपुर के महापौर श्री प्रमोद दुबे ह घलोक ए अवसर म अपन विचार प्रकट करिन।
हम आप ल बता देवन के ये कार्यक्रम के संयोजन राजू शर्मा अउ चंदैनी गोंदा परिवार के जम्मो सदस्य, अभिनेता सुनील तिवारी, लोक गायक गोरेलाल बर्मन के संघरा उदीम ले सफल होईस।
