रायपुर, राज्यपाल सुश्री अनुसुईया उइके अऊ मुख्यमंत्री श्री भूपेश बघेल ह आज छत्तीसगढ़ राज्य स्थापना दिवस म आयोजित राज्योत्सव के दूसर दिन दिया जला के कार्यक्रम के शुभारंभ करिन। राज्यपाल ह मुख्य अतिथि के आसंदी ले संबोधित करत कहिन कि राज्य निर्माण के उद्देश्य तभे पूरा होही जब समाज के आखरी मनखे ल विकास के लाभ मिलय अऊ ऊंखर जीवन स्तर म सकारात्मक सुधार आवय। उमन नागरिक मन ले राज्य के विकास म जादा ले जादा योगदान देहे के आह्वान करिन। सुश्री उइके ह कहिन कि छत्तीसगढ़ राज्य वयस्क होवत हे। स्थापना के बाद ले राज्य म कई ठन क्षेत्र मन म निरंतर प्रगति होए हे। शासन कोति ले जनकल्याण बर कई ठन योजना चलाए जात हे।
राज्योत्सव के दूसर दिन के कार्यक्रम के अध्यक्षता करत मुख्यमंत्री श्री भूपेश बघेल ह कहिन कि जनसामान्य ल लाभान्वित करे बर सरकार फैसला लेत हे। किसान मन ल मजबूती प्रदान करे 2500 रूपिया क्विंटल म धान के खरीदी करे जात हे। किसान मन के करजा माफ करे गए हे। बिजली बिल हॉफ करे गए हे। बस्तर म 1700 किसान मन ल जमीन वापस देवाए के काम सरकार ह करे हे। नौजवान अऊ व्यापारी मन के घलोक ध्यान रखे जात हे। साल 2019-2024 के औद्योगिक नीति कृषि उपर आधारित हे। शहरी क्षेत्र मन म छोटे-मोटे समस्या मन के निपटारा बर वार्ड कार्यालय शुरू करे गए हे। जाति प्रमाण पत्र बर जिहां पहिली मनखे मन ल भटकना परत रहिस, उन्हें पिता के जाति प्रमाण पत्र के आधार म जन्म के समय ही लइका मन ल जन्म प्रमाण पत्र प्रदान करे जावत हे। छोटे भू-खण्ड मन के पंजीयन ले मकान बनाए के सपना जिहां पूरा होय हे, उन्हें राजस्व म वृद्धि होए हे। मुख्यमंत्री ह कहिन कि राज्यपाल सुश्री अनुसूईया उइके बड़ संवेदनशील हें। उमन गांधी जी के 150वीं जयंती म विधानसभा म आयोजित कार्यक्रम म नक्सली हिंसा ले प्रभवित मन बर मकान देहे के आग्रह करिन। श्री बघेल ह कहिन कि ऊंखर आग्रह म तुरन्ते नक्सली हिंसा ले प्रभावित मन बर मकान देहे के घोषणा करे गीस। मुख्यमंत्री ह राज्यपाल कोति ले धान खरीदी बर पत्र लिखे के घलोक सराहना करिन।
उत्कृष्ट काम करइया मनखे अऊ संस्था मन ल राज्य स्तरीय अलंकरण सम्मानित करे गीस
राज्यपाल अऊ मुख्यमंत्री ह ये बेरा म सहकारिता के क्षेत्र म उत्कृष्ट काम करे बर ठाकुर प्यारेलाल सिंह सम्मान जिला लघु वनोपज संघ कांकेर के अध्यक्ष श्री नितिन पोटाई ल, उर्दू भाखा के सेवा बर हाजी हसन अली सम्मान रायपुर के श्री नासिर अली नासिर ल, तीरंदाजी बर महाराजा प्रवीरचन्द्र भंजदेव पुरस्कार बिलासपुर के पैरा तीरंदाजी खिलाड़ी श्री गिरिवर सिंह ल अऊ अंगरेजी प्रिन्ट मीडिया बर मधुकर खेर स्मृति पत्रकारिता पुरस्कार रायपुर के श्रीमती रश्मि अभिषेक मिश्रा ल, दानशीलता, सौहार्द्र अऊ अनुकरणीय सहायता बर दानवीर भामाशाह पुरस्कार रायपुर के श्री सीताराम अग्रवाल ल अऊ आयुर्वेद चिकित्सा बर धन्वंतरी पुरस्कार रायपुर के प्रो. आर. एन. त्रिपाठी ल दे गीस। सांस्कृतिक संध्या म खंझेरी भजन, लोक गीत व नृत्य, गजल अऊ गीत, पियानो अऊ एकॉडियन वादन, शास्त्रीय नृत्य ओड़िसी अऊ भरतनाट्यम, भरथरी अऊ सरगुजिहा गीत के प्रस्तुति दिए गीस।