- श्री बघेल ल बताइस – ‘‘गोबर बेचके कमाए हंव 32 हजार रूपिया‘‘
- अभिभूत होइन मुख्यमंत्री ह स्नेह के संग स्वीकारिन भेंट
- ‘‘आप मन के राज म गांव के मनखे हा राम राज मं जियत हे, अइसे लागत हे‘‘
कोरबा, 05 जनवरी 2021। मुख्यमंत्री श्री भूपेश बघेल आज कोरबा जिला के दउरा के बखत म जब पाली तानाखार विधायक श्री मोहित राम केरकेट्टा के ग्राम पोलमी पहुंचिन, त उहां एक आदिवासी किसान ह उंखर ले भेंट करके कहिन ‘‘मैं हा गोबर बेच के 32 हजार रूपया कमाए हावंव। उई मं के सौ रूपया आप मन ल भेंट करना चाहथ हंव‘‘। वोखर आग्रह म अभिभूत होके मुख्यमंत्री ह किसान के भावना के सम्मान करत वोखर देहे ये भेंट ल बड़ मया के संग स्वीकारिन अऊ ओ मन ल धन्यवाद दीन।
कोरबा जिला के पाली विकासखंड के सुदूर बीहड़ म बसे ग्राम पुटा के किसान नारायण सिंह गोधन न्याय योजना के हितग्राही हे। वो ह गोबर बेचके अब तक 32 हजार रूपिया कमाए हे। नारायण सिंह ह गोधन न्याय योजना लागू करे बर मुख्यमंत्री श्री बघेल के प्रति आभार जतात ओ मन ल छत्तीसगढ़ी भाखा म लिखे पाती भेंट करिन। ये आभार पत्र म किसान नारायण सिंह ह प्रदेश के मुखिया श्री भूपेश बघेल ल लिखे हे के ‘‘आप मन कईसे हा, आप मन मन के राज म हमन अच्छा हवन। आप मन के राज म हमर असन गरीब मनखे मन बर, गोधन न्याय योजना चालू करेहा, जेन म हमर असन गरीब मनखे मन गोबर बेच के कुछ कमा लेत हन। में हा गोबर बेच के 32 हजार रूपया कमाए हावंव। उई मं के सौ रूपया आप मन ल भेंट करना चाहथ हंव। आप मन मन के राज म गांव के मनखे हा राम राज मं जियत हे, अइसे लागत हे। गाड़ा-गाड़ा जोहार अउ राज म खुशहाली करे बर शुभकामना‘‘।
किसान नारायण सिंह ह मुख्यमंत्री ल बताइस के गोधन न्याय योजना के तहत गोबर बेचे के एवज म मिले राशि ले परिवार के जरूरत मन बने पूरा होवत हे। गोबर बेचे ले होवइया सरलग आमदनी के सबले बड़का फायदा ये होय हे कि अब हमला अपन रोज के जरूरत मन बर कोनो के आगू हाथ लमाए के जरूरत नइ परय। मुख्यमंत्री श्री बघेल ह वोखर से कहिन के छत्तीसगढ़ अइसन पहला राज्य हे जऊन हर गोबर खरीद के गरीब वर्ग ल घलोक आय के साधन उपलब्ध कराए हे। राज्य शासन के लक्ष्य हे के आखरी मनखे ल जम्मो योजना मन के लाभ मिलय अऊ हर एक नागरिक आर्थिक रूप ले सशक्त होवय।
