प्रदेशवासी मन ल टीका लगवाए अऊ कोविड एप्रोप्रियेट बिहेवियर के पालन करे के करिन अपील
रायपुर, 28 मई 2021। मुख्यमंत्री श्री भूपेश बघेल ह काली बिहनिया रायपुर के पंडित जवाहर लाल नेहरू स्मृति चिकित्सा महाविद्यालय पहुंचके कोविड-19 ले बचाव के टीका के दुसर खुराक लीन। उमन टीका लगवाए के बाद डॉक्टर मन ले टीकाकरण के बाद के सावधानी मन के जानकारी लीन।
मुख्यमंत्री श्री बघेल ह ये बेरा म प्रदेशवासी मन ले अपील करे हें के ओ मन कोरोना ले बचाव बर अपन पारी आए म टीका खच्चित लगवावयं। जेन मनखे मन ह टीका के पहली डोज लगवा डरे हें, ओ मन निरधारित समय म दुसर डोज लगवावयं, काबर के टीका ही कोरोना ले बचाव के एक कारगर उपाय हे। टीका लगवाए के बाद घलोक सबो मनखे कोविड एप्रोप्रियेट बिहेवियर के पालन करव। मास्क लगाव, समय-समय म हाथ के सफाई करव अऊ फिजिकल डिस्टेंस बनाए रखव। भीड़-भाड़ म जाय ले बचव। मुख्यमंत्री ह कहिन के सबो के सहयोग अऊ परिश्रम ले छत्तीसगढ़ म कोरोना के दुसर लहर ल नियंत्रित करे म काफी हद तक सफलता मिले हे। संक्रमण के दर अभी हाल म 5 प्रतिशत ले नीचे आ गए हे। जनता के सहूलियत बर लॉक डाउन म कुछ छूट देहे गए हे। सबो मनखे सावधानी ल अपनावयं जेखर से कोरोना के खिलाफ लड़ाई जीते जा सकय।
मुख्यमंत्री श्री बघेल ल श्रीमती दिपेश्वरी चंद्राकर ह टीका लगाइस। ये बेरा म गृह निर्माण मण्डल के अध्यक्ष श्री कुलदीप जुनेजा अऊ संसदीय सचिव श्री विकास उपाध्याय, चिकित्सा शिक्षा विभाग के संचालक डॉ. आर. के. सिंह, कलेक्टर डॉ. एस भारतीदासन, वरिष्ठ पुलिस अधीक्षक श्री अजय यादव, रायपुर मेडिकल कॉलेज के डीन डॉ. विष्णु दत्त, डॉ. भीमराव अम्बेडकर अस्पताल के अधीक्षक डॉ. विनीत जैन अऊ मुख्य चिकित्सा एवँ स्वास्थ्य अधिकारी डॉ. मीरा बघेल, स्टॉफ नर्स सुश्री कविता निराला उपस्थित रहिन।
