रायपुर, 25 मार्च 2020। मुख्यमंत्री श्री भूपेश बघेल ह प्रदेश के गरीब परिवार मन ल एक बड़का राहत देवत अप्रेल अऊ मई के चावल निःशुल्क देहे के निर्णय लेहे हें। ये संबंध म राज्य शासन के खाद्य विभाग कोति ले सबो जिला कलेक्टर मन ल आदेश घलोक जारी कर दे गए हे।
कोरोना वायरस (कोविड-19) के संक्रमण के रोकथाम के प्रबंधन के तहत राज्य सरकार कोति ले गरीब परिवार वाले मन ल ये बड़का राहत देहे गए हे। राज्य म सार्वजनिक वितरण प्रणाली के तहत अन्त्योदय, प्राथमिकता, निःशक्तजन, एकल निराश्रित अउ अन्नपूर्णा श्रेणी के राशन कार्डधारी मन ल अप्रेल अऊ मई 2020 के चावल के वितरण एक मुश्त करे के निर्देश राज्य सरकार कोति ले पहिलिच दे देहे गए हे। इही निर्णय के कड़ी म अन्त्योदय, प्राथमिकता, निःशक्तजन, एकल निराश्रित अउ अन्नपूर्णा श्रेणी के राशन कार्डधारक मन ल चावल के वितरण अब निःशुल्क करे जाही।
