भूपेश सरकार ह महापौर परिषद ल दीन महत्वपूर्ण अधिकार, मंत्री डॉ.डहरिया ह समीक्षा बैठक म करिन घोषणा

रायपुर, 12 नवम्बर 2020। नगर निगम क्षेत्र मन म विकास कार्य मन ल गति देहे के उद्देश्य ले राज्य सरकार ह बड़का निर्णय लेहे हे। नगरीय प्रशासन अउ विकास मंत्री डॉ.शिवकुमार डहरिया ह बुधवार के महानदी भवन म नगर निगम मन के महापौर अउ आयुक्त मन के बैठक म घोषणा करिन हे। सरकार के निर्णयानुसार निर्माण कार्य मन म स्थल परिवर्तन के अधिकार अउ निविदा म कम टेंडर दर प्राप्त होए म बचत राशि व्यय करे के अधिकार महापौर परिषद ल देहे गए हे। बैठक म महापौर मन ह विभिन्न निर्माण कार्य मन के समीक्षा के दौरान व्यवहारिक दिक्कत मन के उल्लेख करत हुए ए अधिकार मन के मांग करे रिहिन। नगरीय प्रशासन अउ विकास मंत्री डॉ.डहरिया ह बैठक म कहिन कि सबो आयुक्त, महापौर अउ जनप्रतिनिधि मन के संग समन्वय स्थापित करत हुए निगम के जनता के हित म तेजी ले काम करें। ओमन शासन के फ्लैगशिप योजना मन ल मुख्यमंत्री स्लम स्वास्थ्य योजना, गोधन न्याय योजना, मुख्यमंत्री वार्ड कार्यालय, पौनी पसारी के संगे संग मोर जमीन मोर मकान, मोर मकान मोर चिन्हारी, अमृत मिशन, अधोसंरचना अउ राज्य प्रवर्तित योजना मन के निगमवार विस्तृत समीक्षा करिन। डॉ.डहरिया ह समीक्षा बैठक म पौनी पसारी योजना म अउ अधिक प्रगति लाए अउ सबो निर्माण कार्य पूरा गुणवत्ता के संग समय-सीमा म पूर्ण करे के निर्देश दीन। बैठक म नगर निगमवार एक-एक करके निर्माण कार्य मन के विस्तृत समीक्षा करे गिस। डॉ.डहरिया ह निगम कर अउ यूजर चार्ज के वसूली करत हुए निगम मन के सेल्फ सस्टेनेबल बनाए के दिशा म गंभीरतापूर्वक प्रयास करे के निर्देश दीन। बैठक म विभागीय सचिव अलरमेलमंगई डी.,सूडा के एडीशनल सीईओ सौमिल रंजन चौबे अउ अन्य विभागीय अधिकारी उपस्थित रिहिन। बैठक म कोरबा, अंबिकापुर अउ जगदलपुर के महापौर ऑनलाइन जुड़ीन अउ अन्य नगर निगम मन के महापौर महानदी भवन म आयोजित बैठक म उपस्थित रिहिन।