- देश म प्याज के आपूर्ति बर बफर स्टाक रखे अऊ फौरी राहत बर रिटेल काउण्टर खोले के करिन आग्रह
- छत्तीसगढ़ म टमाटर (पताल) उत्पादक किसान मन ल उचित मूल्य देवाए प्रोसेसिंग यूनिट लगवइया उद्यमी मन ल भारत सरकार के तरफ ले रियायत प्रदान करे के करिन अनुरोध
रायपुर, मुख्यमंत्री श्री भूपेश बघेल ह राज्य म रोजे-रोज के जरूरी जिनिस मन के बाढ़त कीमत उपर प्रधानमंत्री श्री नरेन्द्र मोदी के ध्यान आकर्षित कराए हें। उमन कहिन हें के प्याज, टमाटर अऊ दाल जइसे वस्तु मन हर मनखे के दैनिक आहार म सामिल होथे। एखर सरलग बाढ़त कीमत मन ले मध्यम वर्ग अऊ विशेषकर गरीब वर्ग के मनखे मन ल दिक्कत होवत हे। मुख्यमंत्री ह ए वस्तु मन के कीमत मल ल नियंत्रण म रखे बर राज्य म करे जात उपाय मन के जानकारी देवत दैनिक वस्तु मन के कीमत मन म नियंत्रण बर भारत सरकार ल तात्कालिक अऊ दीर्घकालिक उपाय मन के संबंध म सुझाव घलोक दिए हें।
मुख्यमंत्री श्री बघेल ह राज्य के जनता ल सस्ता दर म प्याज उपलब्ध कराए बर राज्य के प्रमुख नगर म नाफेड के माध्यम ले रिटेल काउंटर चालू करे अऊ बफर स्टाक बनाए के संग प्याज उत्पादक किसान मन ल सब्सिडी संग बहुत अकन सुझाव दिए हें। उमन छत्तीसगढ़ म टमाटर उत्पादक किसान मन ल उंखर उपज के वाजिब मूल्य देवाए बर राज्य म प्रोसेसिंग यूनिट लगइया उद्यामी मन ल केन्द्र सरकार के तरफ ले रियायत प्रदान करे के घलोक आग्रह करे हें।
मुख्यमंत्री श्री बघेल ह प्रधानमंत्री ल लिखे चिट्ठी म लिखे हें कि छत्तीसगढ़ राज्य संग देश के आम मनखे मन के दैनिक जीवन ले जुड़े एक महत्वपूर्ण समस्या कोति मैं आप मन के ध्यान आकर्षित करना चाहत हंव। प्याज, दाल, टमाटर अऊ आन दैनिक जरूरी वस्तु मन के खुले बाजार म मूल्य वृद्धि ले आम मनखे, विशेषकर गरीब परिवार मन बर जीवन-यापन करना कठिन हो गए हे। छत्तीसगढ़ राज्य म अपरेल 2019 म प्याज के रिटेल भाव 20 रूपिया प्रतिकिलो रहिस जऊन बाढ़के अभी हाल म 75 रूपिया प्रतिकिलो हो गए हे।
मुख्यमंत्री ह खुले बाजार म प्याज के बाजार भाव के सतत् निगरानी अऊ जमाखोरी ल रोके अऊ आम मनखे मन ल उचित मूल्य म प्याज उपलब्ध कराए बर राज्य शासन कोति ले उठाए गए कदम मन के जानकारी देवत चिट्ठी म लिखे हें कि छत्तीसगढ़ जरूरी चीज व्यापारी (अनुज्ञापन अऊ जमाखेरी म निर्बंधन) आदेश, 2019 के अंतर्गत प्याज के थोक व्यापारी बर 500 क्विंटल अऊ कमीशन एजेंट बर 100 क्विंटल के अधिक स्टॉक लिमिट निरधारित करे गए हे। राज्य के 5 जिला मन म कार्यरत प्राईस मॉनिटरिंग सेल अऊ राज्य मुख्यालय के प्राईस मॉनिटरिंग सेल के साथ प्याज संग 22 जरूरी वस्तु मन के थोक अऊ रिटेल बाजार भाव के सतत् निगरानी करे जात हे। प्याज के थोक व्यापारी मन के संग जिला प्रशासन के समन्वय ले रायपुर शहर म 7 रिटेल केन्द्र स्थापित करके 70 रूपिया प्रतिकिलो के दर ले अभी हाल म प्याज के विक्रय कराए जात हे।
उमन चिट्ठी म लिखे हे कि ए उदीम के बावजूद प्याज के थोक बाजार भाव म सरलग बढ़ोतरी बने हे। छत्तीसगढ़ राज्य प्याज के कमी वाला राज्य हे अऊ राज्य म प्याज के मासिक जरूरत 30,000 टन हे। राज्य म प्याज के आपूर्ति महाराष्ट्र, आंध्रप्रदेश अऊ कर्नाटक राज्य ले होथे अऊ ए राज्य मन म प्याज के थोक भाव मन म बढ़ोतरी अऊ मांग मुताबिक असवक नइ हो पाय के सेती छत्तीसगढ़ राज्य म प्याज के मूल्य म अगस्त महिना ले सरलग बढ़ोतरी होवत हे। अइसनहे टमाटर के भाव मन म घलोक बेरा-बेरा म अचानके अकतहा बढ़ोतरी देखे ल मिलथे।
मुख्यमंत्री ह प्रधानमंत्री ल लिखे चिट्ठी म आम जनता ल कीमत के बढ़ोतरी ले राहत देवाए बर केन्द्र ल लउहे उदीम के रूप म भारत सरकार तीर प्याज के उपलब्ध बफर स्टॉक म ले नाफेड के माध्यम ले छत्तीसगढ़ राज्य के सबो प्रमुख नगर मन म रिटेल काउण्टर खोलके रियायती दर म आम मनखे मन ल प्याज के विक्रय करे के सुझाव देहे हें। अइसनहे उमन छत्तीसगढ़ संग देश के आन राज्य मन के जरूरत के आकलन करके आन देश मन ले प्याज के तुरंत आयात करे के घलोक सुझाव देहे हें ताकि मांग अऊ आपूर्ति म आए अंतर के सेती खुले बाजार म प्याज के कीमत म होए बढ़ोतरी ल नियंत्रित करे जा सकय।
