अपर कलेक्टर ह अपन हाथ ले सौपीस भूमि स्वामी हक अभिलेख
दुर्ग 04 जुलाई 2020। छत्तीसगढ़ राजस्व प्रबंधन विभाग कोति ले जारी हुकुम के पालन म जिला म नजूल भूमि के 3600 गैर रियायती पट्टा धारक मन ला भूमि स्वामी अधिकार देहे बर कार्यवाही करे जात हे। जानबा हे के अब तक 77 आवेदन के अनुमोदन समिति ह करे हे जेमा 34.97 लाख रूपिया के अनुमोदन होए हे।
इही कड़ी म एक जूलाई के अपर कलेक्टर श्री बी.बी. पंचभाई ह श्री रामकृष्ण पिता चंदुलाल यादव, मठपारा दुर्ग श्री जंगन्नाथ पिता फिरंता बैगा पारा दुर्ग, श्री शत्रुहन, पिता श्री मोहन लाल मठपारा दुर्ग, श्रीमती शांति बाई पति श्री शंकर प्रसाद शर्मा मठपारा दुर्ग ल भूमि स्वामी हक अभिलेख अपन हाथ ले सउंपिस। नजूल पट्टा ल भूमि स्वामी हक म बलदे ले अब हर 30 बछर म पट्टा के नवीनीकरण करवाना नइ परय अउ भूमि स्वामी ल आसानी से बैंक लोन अउ भूमि के बिक्री संग नगर अउ ग्राम निवेश के अनुज्ञेय भूमि उपयोग के मुताबिक उपयोग करे के अधिकार तको मिल जाही। दुर्ग शहर म ये जानकारी ल जनता मन तक बने सहिन पहुचाए बर नगर पालिका कोति ले प्रचार-प्रसार करे जावत हे अउ मुनादी करके पाम्पलेट तको बांटे जावत हे। नजूल पट्टा ल भूमि स्वामी हक म बलदे बर पट्टा के फोटो कापी, शपथ पत्र अउ पहचान पत्र संग नजूल शाखा कलेक्ट्रेट दुर्ग म आवेदन करना परथे।
नजूल अधिकारी अउ डिप्टी कलेक्टर श्री अरूण वर्मा के बताती नजूल भूमि के जम्मो पट्टेदार मन ला हर साल सरलग भू-भाटक पटाना चाही। जेमन नजूल पट्टा के भू-भाटक नइ पटाये हें ते मन ल कार्यालय ले नोटिस जारी करे गए हावय। उमन एहू बताईन के सहर मन म कहूं कोनो सरकार के या नजूल के अतिक्रमित भूमि ला लेना चाहत हें त वो मन ल जमीन के गाईड लाईन दर के 152 प्रतिशत जमा करे म वो जमीन के नियमितिकरण करे जा सकत हे। ये संबंध म सबो नगरीय निकाय मन म अतिक्रामक मन के चिन्हारी करके उमन ला नोटिस देहे जात हे। अइसे अतिक्रामक मन जउन सासन के नियम के मुताबिक रकम जमा करे बर तियार हें ते मन के व्यवस्थापन करे जाही। उमन एहू बताईन के अब तक 18 अतिक्रामक मन कोति ले नियमितिकरण बर सहमति देहे गए हे। जेमा प्रकरण दर्ज करके कार्यवाही करे जात हे।
एखर ले अकतहा अधिनियम के प्रावधान के मुताबिक अवैध खरीदी बिक्री ला नियमितिकरण करवाए जा सकत हे। नगर पालिक निगम भिलाई क्षेत्र के सबो जोन कार्यालय म 134 आवेदक के अवैध खरीदी बिक्री नियमितीकरण बर ईस्तहार प्रकाशित करके दावा आपत्ति आमंत्रित करे गए हे।
