रायपुर, 7 मार्च 2020। विधानसभा अध्यक्ष डॉ. चरणदास महंत अऊ मुख्यमंत्री श्री भूपेश बघेल ह आज विधानसभा के सभागार
म आयोजित कार्यक्रम म वरिष्ठ पत्रकार श्रीमती प्रियंका कौशल के कहानी संग्रह ‘भूत भाई साहब‘ के विमोचन करिन। उमन
पुस्तक के विमोचन म श्रीमती कौशल ल बधाई अऊ शुभकामना दीन।
विधानसभा अध्यक्ष डॉ. चरणदास महंत ह कहिन कि छत्तीसगढ़ बाबा गुरु घासीदास अऊ संत कबीर के पवन धरती ये। ये
शांति, करुणा अऊ आत्मीय प्रेम के धरती ये। हम सबके कल्पना छत्तीसगढ़ ल पुरखा मन के सपना के मुताबिक गढ़े के हे।
उमन श्रीमती कौशल के उदीम ल सहराईन। उमन कहिन कि इहां साहित्यकार मन ल हमेशा सम्मान दे गए हे। विधानसभा
परिसर म पाछू छै महिना म साहित्यकार मन के ये दूसरइया कार्यक्रम आयोजित होए हे।
मुख्यमंत्री श्री भूपेश बघेल ह कहिन कि साहित्य रूमानी दुनिया के संग सही दुनिया ले परिचित कराथे। साहित्यकार, पत्रकार
अऊ कलाकार समाज ल आइना देखाय के संग रद्दा देखाय के काम घलोक करथे। उमन श्रीमती कौशल ल शुभकामना देवत
कहिन कि आज साहित्यकार मन के जमात म एक अऊ नाम जुड़ गीस। उमन व्हाट्सएप म मिलइया सरलग सूचना मन के
सत्यता परखे के जरूरत उपर जोर देवत कहिन कि सत्य के तह तक जाय के पहिली धारणा बनाना समाज अऊ देश बर घातक
हे।
वरिष्ठ साहित्यकार श्री गिरीश पंकज ह पुस्तक के संबंध म बताइस कि ये मां मनुष्य के नव निर्माण के कहानी हे। मनोरंजन
के संग कहानी मन ले पाठक के मन अऊ सोच बदलही। वरिष्ठ पत्रकार श्री शंकर पांडेय अऊ श्री पंकज शर्मा, लेखक श्री पंकज
सुबीर अऊ प्रजापिता ब्रह्माकुमारी केंद्र रायपुर के प्रमुख कमला बहन ह ये मौका म अपन विचार प्रकट करत श्रीमती कौशल ल
शुभकामना दीन।
विधानसभा अध्यक्ष डॉ. चरणदास महंत अऊ मुख्यमंत्री श्री भूपेश बघेल ह ये बेरा म कई क्षेत्र मन म उत्कृष्ठ काम करइया चार
महिला मन ल स्मृति चिन्ह प्रदान करके सम्मानित करिन। एमां 7 विषय म पीएचडी करइया बस्तर के डॉ. जयंती कश्यप,
प्लास्टिक कचरा के प्रति जन जागरूकता बर काम करत भिलाई के सुश्री श्रद्धा साहू, समाजसेवी सुश्री इंदिरा जैन अऊ गरीब
बस्ती मन म सेनिटरी पेड वितरित करइया सुश्री शीला बाघमार सामिल हे। कार्यक्रम के सुरू म राज्य गीत प्रस्तुत करइया
श्रीमती तरला दमाहे ल घलोक अतिथि मन ह सम्मानित करिन। कार्यक्रम म दिव्यांशी शर्मा ह सरस्वती वंदना उपर शास्त्रीय
नृत्य प्रस्तुत करिस।