रायपुर के शारदा चैक म बड़का हादसा, बस के चपेट म आइस बाइक सवार, हालत गंभीर

रायपुर, 11 जनवरी 2021। राजधानी रायपुर म आज शारदा चैक म एक सडक हादसा होइस जेमां एक पायल ट्रेवल्स के बस ह बाइक सवार ल अपन चपेट म ले लीस। घायल बाइक सवार के स्थिति गंभीर बतायें जावत हे। आज बिहनिया इलाहाबाद ले दुर्ग जावत पायल ट्रेवल्स के बस ह शारदा चैक पार करत हुए एक बाइक सवार ल अपन चपेट म ले लीस जेखर ले बाइक सवार गंभीर रूप ले घायल होगे। लोगन ह गोलबाजार थाना पुलिस के मदद ले बाइक सवार ल इलाज बर मेकाहारा भिजवाइस। अउ बस चालक ह खुद ल पुलिस ल सौंप दिस। गोलबाजार थाना पुलिस ह बतइस कि बस म 3 लोगन मौजूद रहिस जेमां चालक मुनेश तिवारी बस चलावत रहिस अउ दुसरा चालक सोय रहिस। अउ एक हेल्पर रहिस जोन बस के चालक के संग बइठे रहिस। पायल ट्रेवल्स के पैसेंजर बस इलाहाबाद ले दुर्ग जिला जावत रहिस तभे ये हादसा होइस। बाइक सवार के पहिचान म पुलिस जुटे हे। मामला के विवेचना कर पुलिस हे जाँच शुरू कर दीन हे।