अंबिकापुर, 13 अगस्त 2020। सेवानिवृत्त चौकीदार ले पेंशन बनाये बर रिश्वत लेवत जल संसाधन विभाग के लिपिक ल गिरफ्तार करे गे हे। आवेदक लोचन सिंह ह एंटी करप्शन ब्यूरो म एखर शिकायत करे रिहिस हे। आवेदक के शिकायत म एंटी करप्शन टीम ह लिपिक विनय कुमार सिन्हा ल रिश्वत लेवत रंगे हाथ पकड़िस। लिपिक द्वारा सात हजार रिश्वत के मांग करे गे रिहिस। आवेदक पहली घलो आरोपी ल 3 हजार रिश्वत दे चुके रिहिस।
उप पुलिस महानिरिक्षक आरिफ शेख के दिशा निर्देशन म भ्रष्टाचार रोधी कार्यवाही के अंतर्गत आज एंटी करप्शन ब्यूरो अम्बिकापुर के टीम ह ट्रेप के कार्यवाही करत हुए जल संसाधन विभाग म पदस्थ आरोपी लिपिक विनय कुमार सिन्हा ल रिश्वत के रकम के संग गिरफ्तार करे गे हे। लोचन सिंह निवासी अम्बिकापुर ह उप पुलिस अधीक्षक, एंटी करप्शन ब्यूरो अंबिकापुर म शिकायत करे रिहिस कि ओखर पिता रघुराम जो जल संसाधन विभाग ले वर्ष 2015 म चौकीदार के पद ले सेवानिवृत्त होगे रिहिस। उंखर आज तक ग्रेच्युटि अउ पेंशन के पइसा नई मिले हे। इही काम बर आरोपी द्वारा आवेदक ले 7000/- रुपिया रिश्वत के मांग करे गे रिहिस। ये काम बर आवेदक ह पहली घलो आरोपी ल 3000/- रूपिया दे चुके रिहिस।
शिकायत के एन्टी करप्शन ब्यूरो अम्बिकापुर ह सत्यापन कराइस अउ जब ये सिद्ध होगे कि एक लोक सेवक अपन शासकीय कर्तव्य मन के निर्वहन बर अवैध धन के मांग करत हे त आज एन्टी करप्शन ब्यूरो अम्बिकापुर के टीम ह जल संसाधन के कार्यालय ले आवेदक के द्वारा आरोपी ल रिश्वत के रकम ल लेवत रंगे हाथ पकड़े गिस। आरोपी के उक्त कृत्य धारा 7 भ्रष्टाचार निवारक अधिनियम 1988 के तहत् दण्डनीय अपराध होय म आरोपी ल विधिवत गिरफ्तार करके विशेष न्यायालय के समक्ष प्रस्तुत करे जाही।
