रायपुर, मुख्यमंत्री श्री भूपेश बघेल ह काली संझा अपन निवास कार्यालय म गोधन न्याय योजना के राशि अंतरण कार्यक्रम के बेरा म राज्य के किसान मन के हित म एक बड़का घोषणा करिन। उमन कहिन कि किसान खाद-बीज के अग्रिम उठाव के जइसे अब सोसायटि अऊ गौठान मन ले वर्मी कम्पोस्ट अऊ सुपर कम्पोस्ट के घलोक अग्रिम उठाव कर सकहीं। मुख्यमंत्री ह ये मौका म गौठान समिति अऊ महिला स्व-सहायता समूह मन ल उंखर गतिविधि मन के बेहतर संचालन बर एंडवास राशि उपलब्ध कराए के हुकुम घलोक दीन। ये मौका म मुख्यमंत्री ह गोधन न्याय योजना के तहत गौठान मन म गोबर बेचइया पशुपालक गांव वाले मन संग गौठान समिति अऊ महिला स्व-सहायता समूह मन ल कुल 5 करोड़ 38 लाख रूपिया के राशि के ऑनलाइन अंतरण करे गीस। मुख्यमंत्री ह कहिन कि ये छत्तीसगढ़ राज्य बर गौरव के बात हे कि हमर गोधन न्याय योजना ल झारखंड राज्य म जस-के-तस अपन राज्य म लागू करे के निर्णय लेत एला अपन बजट म सामिल करे गए हे।
मुख्यमंत्री ह कहिन कि हमार गौठान अऊ गोधन न्याय योजना के सफलता अब कोनो ले छुपे नइ हे। मोला ये बतात गर्व होवत हे कि आज राज्य के 2800 गौठान स्वावलंबी हो गे हे, जेमा राज्य म बने अऊ संचालित गौठन मन के संख्या के एक तिहाई ले घलोक जादा हे। ये स्वावलंबी गौठान अब गोधन न्याय योजना के अंतर्गत खुद के राशि ले गोबर खरीदी अऊ गौठान के व्यवस्था खुदे संभाले लगे हे। ये खुशी के बात हे कि स्वावलंबी गौठान अब पशुपालक गांव वाले मन ले गोबर खरीदी म खुद के पूंजी के निवेश करे लगे हे। स्वावलंबी गोठन मन ह 12 करोड़ 60 लाख रूपिया के गोबर, खुद के राशि ले खरीदे हें। एखर खातिर मुख्यमंत्री ह स्वावलंबी गोठान समिति के सबो पदाधिकारी अऊ सदस्य मन ल बधाई दीन।
मुख्यमंत्री ह कहिन कि तीन साल पहिली हमन ह नवा छत्तीसगढ़ गढ़े के संकल्प ले रहेन, अपन छत्तीसगढ़ ल नवा पहिचान देवाए के संकल्प ले रहेन, अपन छत्तीसगढ़-महतारी के मान बढ़ाए के संकल्प ले रहेन। आज तीन साल बाद मैं बहुत गर्व के संग कह सकत हंव कि हमर सरकार ह अपन हर वादा के मुताबिक ये संकल्प ल घलोक पूरा कर देखाए हे।
छत्तीसगढ़ सरकार ह अपन किसान, आदिवासि, मजदूर अऊ शोषित-पीड़ित मनखे मन बर ए तीन बछर म जेन कदम उठाए हे, आज वोखर पूरा देश म चर्चा होवत हे। विपक्ष के मनखे घलोक छत्तीसगढ़ के योजना मन के तारीफ करत हे। दूसर राज्य मन म घलोक अइसनेच योजनाएं लागू करे के वादा करत हें। अभी उत्तरप्रदेश म प्रधानमंत्री मोदी जी ह उहां के मनखे मन ले गोबर खरीदी के योजना शुरु करे के वादा करिन। एखर ले पहिली घलोक संसद म कृषि मामला के स्थायी समिति गोधन न्याय योजना ल पूरा देश म लागू करे के मांग करे हे। नीति आयोग ल भारत सरकार के थिंक-टैंक कहे जाथे। नीति आयोग ह परन दिन ट्वीट करके पूरा देश ल बताए हे कि बस्तर अऊ दंतेवाड़ा के महिला मन कइसे महुआ-लड्डू, चाय, जैम, जेली अऊ कुकीज जइसे खाद्य पदार्थ तियार करके खुद ल आर्थिक रूप ले मजबूत करत हें।
ये बेरा म मुख्यमंत्री के सलाहकार श्री प्रदीप शर्मा, छत्तीसगढ़ खनिज विकास निगम के अध्यक्ष श्री गिरीश देवांगन, सचिव कृषि डॉ एस. भारतीदासन, संचालक पशु चिकित्सा सेवाएं श्रीमती चंदन संजय त्रिपाठी अऊ आन अधिकारी उपस्थित रहिन।
मुख्यमंत्री ह किसान मन के हित म करिन बड़का घोषणा
