फलोद्यान मन म मुनगा अऊ नींबू लगाए जाही जेकर फैंसिंग करौंदा ले होही
दुर्ग, 1 जून 2020। मुख्यमंत्री श्री भूपेश बघेल के मंशा के मुताबिक राज्य म व्यापक पौधरोपण के मुहिम चलाए जाना हे। दुर्ग जिला म घलोक एला लेके तैयारी सुरू हो गए हे। आज कलेक्ट्रेट म होए बैठक म एखर रणनीति बनाए गीस। प्लांटेशन ल लेके फोकस दो प्रकार ले होही। पहला माई सड़क मन के पाई मन म पौधरोपण करे जाही। एखर बर बर, पीपर आदि के पौधा लगाए जाही। बर अऊ पीपर लउहे बाढ़थे अऊ बहुत समे तक जीथे। दूसरा फोकस मुनगा अऊ नींबू के सामूहिक फार्मिंग उपर होही। एखर बर जिला म बड़का पैच के चिन्हारी करे जाही जिहां कम से कम एके प्रजाति के 5000 पौधा के रोपण होही। जगा मन के चिन्हारी काले च कर ले जाही।
कलेक्टर डॉ. सर्वेश्वर नरेंद्र भूरे ह ये संबंध म अधिकारी मन ल विस्तार ले निर्देश दीन। उमन कहिन के पौधरोपण अऊ हरियाली के दायरा बढ़ाना शासन के सर्वोच्च प्राथमिकता मन म हे अऊ एला पूरा करे बर तुंरते जुटना हे। पौधा मन के सुरक्षा बर ट्री गार्ड के व्यवस्था होही। ट्री गार्ड के सप्लाई के काम स्वसहायता समूह करहीं। एखर से स्वसहायता समूह मन के घलोक आय बाढ़ही। कलेक्टर ह आज ये संबंध म वनमंडलाधिकारी, जिला पंचायत सीईओ, कार्यपालन अभियंता पीडब्ल्यूडी, एसडीएम अउर उद्यानिकी अधिकारी ले परखर गोठ-बात करिन। चर्चा म उन फलदार पौधा मन के रोपण म जोर दीन जऊन दुर्ग जिला के वातावरण के अनुकूल होवय। एमां मुनगा, नींबू अऊ आंवला के पौधा उपर जादा जोर रहिस। मुनगा अऊ नींबू म सबसे जादा जोर देहे के निर्णय ले गीस। एकर बर चुने गए जमीन म बड़ पैमाना म फलोद्यान लगाए जाही। मुनगा अपन आयरन कंटेट बर सबले जादा उपयोगी होथे। मुनगा के पौधा तियार होए ले आंगनबाड़ी केंद्र अऊ आश्रम शाला मन म एखर सप्लाई हो सकही। एखर से हरियाली के दायरा तो बाढ़हीच, कुपोषण ले लड़े के दिशा म घलोक बड़का मदद मिलही। चुने गए फलोद्यान मन के फैंसिंग करौंदा ले होही।
आज के बैठक म पीडब्ल्यूडी अउ वन विभाग के अधिकारी मन के संग वो सड़क मन के चिन्हारी करे गीस जिहां व्यापक स्तर म पौधा लगना हे। एखर अलावा रिवर साइड प्लांटेशन उपर घलोक चर्चा होइस। बैठक म शहर के भीतर डिवाइडर मन म अलग पगकार के पौधरोपण अऊ सड़क के किनारे अलग प्रकार के पौधरोपण के निर्णय लेहे गीस। बैठक म कलेक्टर ह नगरीय क्षेत्र मन म प्लांटेशन बर संबंधित सीएमओ ल घलोक निर्देशित करिन अऊ एसडीएम ले ये काम के मानिटरिंग के निर्देश घलोक दीन। बैठक म पौधरोपण के बाद ओला सहेजे अऊ बड़का करे तक के प्रक्रिया के संबंध म विस्तार ले योजना बनाए गीस।