दिल्ली म बड़का डील! छत्तीसगढ़ बनही फूड प्रोसेसिंग हब? मुख्यमंत्री ह रखिन गेम-चेंजर प्रस्ताव

रायपुर, मुख्यमंत्री विष्णुदेव साय ह नई दिल्ली म केंद्रीय खाद्य अऊ उपभोक्ता मामला के मंत्री चिराग पासवान ले मुलाकात करके छत्तीसगढ़ के खाद्य प्रसंस्करण सेक्टर ल नवा दिशा देवइया कई महत्वपूर्ण प्रस्ताव रखिन। दुनों नेता मनके बीच खाद्य सुरक्षा, कृषि-आधारित उद्योग अऊ फूड प्रोसेसिंग ल मजबूत करे उपर सार्थक चर्चा होइस।
मुख्यमंत्री साय ह छत्तीसगढ़ म NIFTEM संस्थान खोले के अनुरोध करिन, जेखर से युवा मन ल आधुनिक खाद्य तकनीक अउ उद्यमिता के उच्चस्तरीय प्रशिक्षण मिल सकय। उमन कहिन के कृषि प्रधान राज्य होए के कारन ये संस्थान हजारों छात्र, किसान मन अऊ उद्योग मन ल प्रत्यक्ष लाभ देही।
साय ह वर्ल्ड फूड इंडिया रीजनल समिट रायपुर म आयोजित करे के आग्रह घलोक करिन, जेन ल चिराग पासवान ह सकारात्मक रूप ले स्वीकार करिन। मुख्यमंत्री ह बताइन के ये आयोजन रायपुर के समृद्ध खाद्य परंपरा ल वैश्विक पहिचान देही अऊ खाद्य उद्योग मन म बड़का निवेश ल बढ़ावा देही।
उमन राज्य म फूड टेस्टिंग लैब अऊ फूड इर्रेडिएशन यूनिट के स्थापना खातिर घलोक केंद्र ले सहयोग मांगिंन। मुख्यमंत्री ह कहिन के नवा औद्योगिक नीति म फूड प्रोसेसिंग ल विशेष बढ़ावा देहे गए हे, जेखर अंतर्गत Drools कंपनी ₹1,000 करोड़ के निवेश करत हे, जेखर से 3,000 नवा रोजगार बनही। श्री साय ह बताइन के लक्ष्य छत्तीसगढ़ ल राइस ब्रान ऑयल हब बनाना हे, ताकि आयात म निर्भरता कम होवय अऊ आत्मनिर्भर भारत के लक्ष्य पूरा हो सकय।