रायपुर 23 अक्टूबर 2020. किस्मत ल अपन नियती मान लेवईया महिला मन के जीवन म एक नवा अँजोर के रूप म ’’बिहान ‘‘ सामिल होय हे। गरियाबंद जिला के छुरा अंचल के आर्थिक रूप ले कमजोर महिला मन बिहान ले जुड़के खुद ल नवा पहिचान देवत हे। बिहान ले जुड़कर महिला मन ह अब धारा ले उलट बोहाये के ठाने हें, एखर से इंकर जीवन म अऊ निखार आवत हे। संघर्ष ले सफलता कोति कदम बढ़इया ए महिला मन ह पहिली तो खुद ल समूह ले जोड़ीन फेर सामूहिक बचत, निवेश अऊ उत्पादन के सिद्धांत म आगू बढ़त नवा पहिचान बनाए लगिन। अंचल म कई महिला मन ह अइसन व्यवसाय ल चुने हें जिहां पुरूष मन के वर्चस्व रहे हे। सेन्ट्रिंग व्यवसाय, किराया भंडार, पशुपालन, आधुनिक खेती, आटा चक्की, होटल जइसे व्यवसाय सफतलापूर्वक करत हें।
छुरा जनपद के सीईओ सुश्री रूचि शर्मा ह बताइस के शासन के मंशा के मुताबिक छुरा अंचल म बिहान के माध्यम ले महिला मन ल समूह ले जोड़के ओ मन ल आर्थिक अऊ समाजिक रूप ले सक्षम बनाए के पहल करे जात हे। ग्राम रजनकटा के श्रीमती कौशिल निषाद सेन्ट्रिंग प्लेट के व्यवसाय करत हे। उमन समूह ले जुड़े के बाद 75 हजार रूपिया के लोन लेके मिक्सर मशीन अऊ सेन्ट्रिंग प्लेट खरीद के अपन पति के व्यवसाय ल घलोक मजबूती प्रदान करे हे। आज वोकर तीर दो सौ प्लेट अऊ दो हजार वर्गफीट ढलाई के लायक सामान मौजूद हे। अब ओ ह हर महीना करीबन 10 हजार रूपिया के आमदनी कमावत हे।
ग्राम कुरूद के गृहिणी श्रीमती त्रिवेणी साहू ह बिहान ले जुड़के 80 हजार रूपिया लोन लेके टेण्ट हाऊस के कारोबार ल आगू बढ़ाइस। एखर से ओ ल घर चलाय लइक आमदनी आसानी ले हो जात हे। एखर से वो ह अपन खुद बर दु पहिया वाहन खरीदे हे अऊ कम्प्युटर सीख के बिहान म ही सेवा देवत हे। अइसनहे ग्राम पेन्ड्रा के जय बड़ा देव समूह ले जुड़े के बाद लकेश्वरी धु्रव के आर्थिक स्थिति म बदलाव साफ देखे ल मिलथे। समूह ले ऋण लेके ओखर आत्मविश्वास बाढ़िस अऊ अब वो सिलाई, खेती काम, साग-भाजी उत्पादन अऊ जैविक खाद के निर्माण करे लगे हे। एखर से वोखर आर्थिक स्थिति मजबूत हो गए हे अऊ अब वो अपन घर बनाए के सपना ल साकार करे म जुटे हे। ग्राम मुड़ागांव के एकता महिला समूह ले जुड़े श्रीमती पूजा गुप्ता होटल के कारोबार चलावत हे। जेखर से वोखर अऊ परिवार के आजीविका बने सहिन चलत हे। ग्राम खट्टी के श्रीमती मोंगरा साहू समूह ले ऋण लेके उन्नत अऊ वैज्ञानिक खेती ले बरबट्टी के खेती करके किसान मन बर मिसाल बन गए हे। वो बताइस के समूह ले जुड़े के बाद अऊ ऋण लेके अपन सपना ल पूरा कर पावत हे। एखर अलावा ग्राम कुरूद के श्रीमती निर्मला निर्मलकर गुपचुप चाट ठेला खोलके अपन जिंदगी के गाड़ी आगू बढ़ावत हे। ग्राम पोंड के श्रीमती मधु साहू रेडी-टू-ईट निर्माण ले जुरिस। रेडी-टू-ईट के निर्माण बर वो ह समूह ले ही ऋण लेके आटा चक्की दुकान स्थापित करे हे। बिहान ले जुड़के कई महिला मन मछली पालन, बकरी पालन,आटा चक्की, फैंसी स्टोर, अऊ किराना दुकान के काम करत एक नवा इबारत लिखत हे।
