कोण्डागांव, 26 अप्रैल 2021 सम्मार।
कोरोना संक्रमण के दुसरइया विकराल होए म जिला म एकर बचाव बर जम्मो वर्ग अउ तबका के लोगन मन सहयोग देहे बर शासन-प्रशासन संग खाँध म खाँध मिलाके बूता करत हावय। ये मानवता के सेवा म बिहान समूह के माइलोगन मन तको जन-जन तक कोरोना ले बाचे के तरीका के संबंध म जागरूकता संदेश देहे बर अपन पोठहा योगदान देवत हावय। एकर बर बिहान स्व-सहायता समूह के माइलोगन मन अपन -अपन गाँव म जागरूकता अभियान छेड़ देहे हावय। उन्कर डाहर ले तीर-तखार के हरेक गाँव के भीथिया मन जागरूकता संदेश अंकित करे जावत हावय। जेकर तहत् विगत दिनं 449 गाँव मन के स्व-सहायता समूहं के माइलोगन मन डाहर ले 4945 भीथिया मन म जागरूकता संदेश लिखे के बूता करे गे हवय अउ ये अभियान सबो गाँव मन सरलग चलत हावय।
जानबा होवय कि स्व-सहायता समूह के माइलोगन मन डाहर ले ये अभियान बर उत्साह प्रकट करे के पीछू कलेक्टर पुष्पेन्द्र कुमार मीणा के निर्देश म जिला मिशन प्रबंधक विनय सिंह के नेतृत्व म सबो 20 कलस्टर के संगठन अध्यक्ष मन ल आॅनलाईन भीथिया लेखन के प्रशिक्षण देहे गए रिहिन। जेमन सबो स्व सहायता समूह ल आॅनलाईन प्रशिक्षण देके भीथिया लेखन कला के संबंध म जानकारी दीन । हरेक गाँव म महिला समूह कोति ले जन जागरूकता बर भीथिया लेखन के बूता ल स्वेच्छा से करे जावत हावय ।