गौरेला-पेंड्रा-मरवाही, जिला के बिहान महिला स्व-सहायता समूह मन के महिला मन ह केंद्रीय आवासन अउ शहरी कार्य राज्य मंत्री श्री तोखन साहू ले आत्मीय भेंट करके उमन ला जिला के पहिचान विष्णुभोग चांउर अउ विष्णुभोग धान ले बने खास राखी भेंट करिन।
स्थानीय साधन मन ले बने ए सामान मन ला देखके श्री साहू ह बिहान समूह के महिला मन के रचनात्मकता, मिहनत अउ आत्मनिर्भरता के भाव के बड़ाई करिन। उमन महिला मन कोती ले स्थानीय उपज ला नवा रूप म आगू लाके आजीविका के मउका तियार करे के पहल ला प्रेरणादायी बताइन।
विष्णुभोग धान ले बने राखी बनिस आकर्षण के केंद्र
बिहान समूह के महिला मन कोती ले विष्णुभोग धान ले तियार करे गे खास राखी ह स्थानीय संस्कृति, रचनात्मकता अउ महिला सशक्तिकरण के सुग्घर संगम आय। पुरखौती तिहार राखी (रक्षाबंधन) ला जिला के स्थानीय खेती-किसानी के उपज संग जोड़के बने ये राखी सिरिफ हाथ ले बने चीज नो हे, बल्कि स्थानीय साधन मन के बढ़िया उपयोग अउ ग्रामीण महिला मन के उद्यमशीलता के घलो मिसाल हे।
विष्णुभोग धान ह जिला के खास पहिचान ले जुड़े उपज आय। महिला मन इही स्थानीय पहिचान ला अपन हुनर अउ कला संग जोड़के अइसन उत्पाद तियार करिन, जउन स्थानीय संस्कृति अउ आजीविका दूनों ला एक संग बढ़ावा देवत हे।
स्थानीय साधन ले रोजगार अउ अतरिक्त आमदनी के रद्दा
बिहान ले जुड़े महिला स्व-सहायता समूह मन कोती ले स्थानीय स्तर म मिले साधन मन के उपयोग करके आनी-बानी के सामान तियार करे जात हे। ए काम-बूता के माध्यम ले महिला मन ला रोजगार अउ उपरहा आमदनी के मउका मिलत हे, अउ उमन अपन परिवार के आर्थिक हालत ला मजबूत बनाए म हाथ बंटावत हें।
विष्णुभोग चांउर अउ ओकर ले जुड़े स्थानीय सामान मन ला सुग्घर रूप देके बाजार तक पहुंचाय म महिला समूह मन के पहल ह ग्रामीण अर्थव्यवस्था ला मजबूत बनाए के ताकत रखथे। अइसन काम-बूता ह महिला मन म भरोसा बढ़ाय के संग उमन ला आर्थिक रूप ले आत्मनिर्भर बनाय म घलो बड़का भूमिका निभावत हे।
महिला सशक्तिकरण अउ स्थानीय पहिचान के सुग्घर संगम
विष्णुभोग धान ले बने खास राखी ह ए संदेस देवत हे कि स्थानीय साधन अउ पुरखौती पहिचान ला हुनर संग जोड़के आजीविका के नवा मउका तियार करे जा सकत हे। बिहान समूह के महिला मन के ये पहल महिला सशक्तिकरण, स्थानीय उत्पाद मन ला बढ़ावा देय अउ आत्मनिर्भर ग्रामीण अर्थव्यवस्था के डगर म एक ठन सकारात्मक कदम आय।