CHHATTISGARHI NEWS: राजनांदगांव, छत्तीसगढ़ म महिला स्व-सहायता समूह मन के माध्यम ले ग्रामीण अर्थव्यवस्था ल मजबूत करे अऊ महिलामन ल आत्मनिर्भर बनाय के दिशा म ‘बिहान’ योजना ह एक बड़का क्रांति लाए हे। ए योजना के सुग्घर परिणाम अब मैदान म साफ नजर आवत हे, छत्तीसगढ़ के एक साधारण महिला बागरेकसा गांव के श्रीमती कविता निषाद कविता निषाद ह अपन अटूट मेहनत, लगन अऊ पक्का इरादा के बदौलत ‘लखपति दीदी’ बने के गौरव हासिल करे हे। बिहान योजना ले जुड़ के कविता निषाद ह आजीविका गतिविधिमन म सक्रिय रूप से भाग लीस अऊ स्वरोजगार के नवा रद्दा अपनाइस। योजना के तहत मिलैया मार्गदर्शन, वित्तीय सहयोग अऊ प्रशिक्षण के सही उपयोग करके ओ ह न सिरिफ अपन परिवार के आमदनी ल कई गुना बढ़ाइस, बल्कि समाज म एक अलग पहचान घलो बनाइस।
आज ओखर आर्थिक स्थिति बने मजबूत होगे हे, जेखर से ओ अपन परिवार के भरण-पोषण अऊ जम्मो जरूरत मन ल बहुतेच आसानी से पूरा करत हे। कविता निषाद के ए प्रेरणादायक सफलता के कहानी बताथे के कहूं ग्रामीण महतारी-बहिनीमन ल सही मंच अऊ अवसर मिल जाय, त ओमन अपन मेहनत के बलबूता म हर मुकाम हासिल कर सकथें। बिहान योजना के जरिए मिलइया बढ़ावा अऊ संबल ले आज गाँव-गाँव के दीदीमन आर्थिक रूप से सक्षम होत हें। कविता के ए कामयाबी पूरा क्षेत्र के महिलामन बर मिसाल बन गे हे, जे ह महिलामन ल आगू बढ़ के स्वरोजगार अपनाए बर प्रेरित करत हे। ए प्रकार के सकारात्मक बदलाव ले ग्रामीण अंचल म खुशहाली अऊ आत्मनिर्भरता के नवा दौर शुरू होगे हे।
बिहान योजना: जबर मिहनत करके कविता निषाद बनिस ‘लखपति दीदी’, गांव के महिलामन बर बनिस उदाहरन
