महीना के आय पहुँचीस 2.5 लाख रूपया ले 03 लाख रूपया तक
मुंगेली, राष्ट्रीय ग्रामीण आजीविका मिशन के तहत ‘बिहान’ योजना गांव के माई लोगन मन के आर्थिक मजबूती बर एक बड़का आधार बन गे हे। इही कड़ी मा मुंगेली जिला के लोरमी विकासखण्ड के ग्राम खपरीडीह के रहइया श्रीमती पंचबाई साहू ह बिहान योजना ले जुड़के आत्मनिर्भर बने के रद्दा मा बड़का सफलता पाय हे। बिहान योजना ले जुड़के ओमन अपन किसमत ला बदल डारिन, अब ओमन एक सफल व्यवसायी बन गे हें। स्व-सहायता समूह मा जुड़े के पहिली पंचबाई साहू के आर्थिक हालत बहुत कमजोर रहिस। परिवार के रोज के जरूरत मन ला पूरा करे बर ओला साहूकार मन ले जादा ब्याज मा करजा लेहे ल परत रहिस। आर्थिक तंगी के सेती न केवल परिवार के जरूरी जरूरत मन अधूरा रहि जात रहिस, भलुक आत्मसम्मान मा घलो आंच आवत रहिस।
श्रीमती पंचबाई ह बताइन के बिहान योजना के तहत ‘माँ सरस्वती महिला स्व-सहायता समूह’ के माध्यम ले ओला पइसा-कौड़ी के लेनदेन, सामूहिक सहयोग अउ आत्मनिर्भर बने के मऊका मिलिस। ओमन अपन काम-धंधा बर रिवॉल्विंग फंड ले 15 हजार रूपया, बैंक करजा 1 लाख 50 हजार रूपया अउ 60 हजार रूपया सीआईएफ राशि प्राप्त करीन। संग मा समूह कोति ले ओला 30 हजार रूपया के अतरिक्त मदद घलो मिलिस। मिले पइसा ले ओमन फर्नीचर दुकान के सुरूआत करीन। मेहनत, सही योजना अउ समूह के संग ले ओकर व्यवसाय ह सरलग आगू बढ़त गिस।
आज ओकर महीना के आय लगभग 2.5 लाख रूपया ले 03 लाख रूपया तक पहुँच गे हे। एखर ले ओकर लइका मन के पढ़ाई-लिखई सुग्घर होवत हे अउ जीवन स्तर मा घलो सुधार आए हे। श्रीमती पंचबाई साहू आज सिरिफ खुद सफल नइ हे, भलुक गाँव के आन महिला मन ला घलो समूह ले जुड़े अउ आत्मनिर्भर बने बर प्रेरित करत हे।
