स्व-सहायता समूह ले जुड़के बनिस ‘लखपति दीदी’, बाढ़िस आत्मविश्वास अऊ सामाजिक सनमान
सरगुजा, छत्तीसगढ़ सरकार के बड़का योजना राज्य ग्रामीण आजीविका मिशन ‘बिहान’ गांव-घर के माइलोगन मनके जिन्दगी म सुग्घर बदलाव लावत हे। स्व-सहायता समूह मनके माध्यम ले माइलोगन मन आर्थिक रूप ले मजबूत होवत हें अऊ आत्मनिर्भर बने के दिसा म नवा इतिहास रचत हें। पूरा प्रदेश म हजारों माइलोगन मन आजीविका के काम-बूता ले जुड़केअपन परिवार के आर्थिक स्थिति ला मजबूत बनावत हें अऊ समाज म नवा चिन्हारी स्थापित करत हें।
सरगुजा जिला के गांव चठिरमा के श्रीमती तारामणि राजवाड़े ये बदलाव के एक सुग्घर मिसाल आय। एकता स्व-सहायता समूह ले जुड़े के बाद ओ ह खेती-किसानी के बूता ला नवा ढंग ले आगे बढ़ाइस अऊ आज ‘लखपति दीदी’ के रूप म अपन चिन्हारी बना चुके हे।
समूह ले मिलिस आर्थिक सहारा
तारामणि राजवाड़े हा बताथे के बिहान योजना ले जुड़े के बाद ओ ला स्व-सहायता समूह के माध्यम ले करजा के सुबिधा अऊ जरूरी मदद मिलिस। ये सहयोग के उपयोग ओ ह खेती-किसानी के काम म करिस, जेकर ले फसल के पैदावार अऊ कमई दूनो म बढ़ोतरी होईस। सरलग मिहनत अऊ बने देख-रेख के बल म ओ अपन आर्थिक स्थिति ला मजबूत बनाइस।
खेती बनिस समृद्धि के आधार
खेती-किसानी के काम ला बढ़ाय ले तारामणि के कमाई म सरलग बढ़ोतरी होईस। आज ओ अपन परिवार के आर्थिक जरूरत मनला पूरा करे के संगे-संग आघू बर बचत घलो करत हे। ओखर ये सफलता हा आस-पास के दूसर माइलोगन मनला घलो खुद के रोजगार अऊ खेती उपर अधारित काम-बूता ले जुड़े बर प्रेरणा देवत हे।
बाढ़िस आत्मविश्वास, मिलिस नवा चिन्हारी
तारामणि के कहना हे के स्व-सहायता समूह ले जुड़े के बाद ओखर आत्मविश्वास बाढि़स। अब ओ पइसा-कउड़ी के फैसला लेहे म घलो सक्षम हे अऊ परिवार के विकास म आघू आके काम करत हे। ओ ह कहिस के बिहान योजना हा ओ ला आत्मनिर्भर बने के अवसर दीस अऊ जिन्दगी म आघू बढ़े के नवा रस्ता देखाइस।
अपन ये सफलता बर तारामणि राजवाड़े हा प्रधानमंत्री श्री नरेंद्र मोदी अऊ मुख्यमंत्री श्री विष्णु देव साय के आभार जतावत कहिस के सरकार के योजना मनहा गांव-घर के माइलोगन मनला आर्थिक रूप ले मजबूत बने के बड़का अवसर देहे हे।
प्रदेश म ‘बिहान’ योजना के माध्यम ले हजारों माइलोगन मन खेती, गरु-बछरू पालन, छोटे उद्योग अऊ दूसर आजीविका के काम मनले जुड़के आत्मनिर्भरता कोती आगू बढ़त हें। ये योजना हा माइलोगन मनके आर्थिक अऊ सामाजिक मजबूती के संगे-संग विकसित छत्तीसगढ़ के निर्माण म घलो बड़ महत्व के भूमिका निभावत हे।