गणेशु के चेहरा खिलिस: बिजली बिल होइस आधा
जांजगीर-चांपा, राज्य सरकार कोति ले बिजली बिल आधा करे ले जिला के हजारों परिवार ल राहत मिले हे। राज्य सरकार के घोषणा ल अमल म लाये जात हे। मनखे मन के चार सौ यूनिट तक बिजली खर्च करे म घलोक बिल आधा राशि के बिल आथे। मनखे मन के चेहरा ले अब बिजली बिल के तनाव खतम हो गए हे। कुछ महिना पहिली तक मनखे मन ल बड़का राशि बिजली म खर्च करना परत रहिस। बिजली बिल मनखे मन बर मानसिक तनाव के कारण बन गए रहिस।
विकासखण्ड नवागढ़ के ग्राम पचेड़ा के किसान श्री गणेशु ह बिजली बिल देखात अपन खुशी जाहिर करिस। ओ हर बताइस कि ए महिना वो मात्र 50 रूपिया बिल जमा करे हे। वो अपन आमदनी ले अतका राशि आसानी ले पटाए म सक्षम हे। श्री गणेशु ह बताइस कि तीन महिना पहिली तक हर महिना 3 ले 4 सौ रूपिया या जादा बिल जमा करना परत रहिस। एक एकड़ के खेती के आय अउ बड़े परिवार के जिम्मेदारी के संग बिजली बिल के जादा राशि घलोक बड़ परेशानी के कारण बन जात रहिस। उमन राज्य सरकार ल ए जनहितैषी योजना के बर धन्यवाद देहे हे।
हम आप ल बता देवन के राज्य सरकार के निर्णय ले घरेलु विद्यतु उपभोक्ता मन ल बड़ राहत मिले हे। निर्णय के मुताबिक एक मार्च 2019 ले चार सौ यूनिट तक के बिजली उपयोग करे म आधा राशि के बिल दे जात हे। जेखर से उपभोक्ता मन के चेहरा खिल गे हे। ए योजना के लाभ फ्लैट रेट चयन करइया उपभोक्ता मन ल घलोक मिलही। फ्लैट रेट 100 रूपिया के जगा म केवल 50 रूपिया जमा करना होही। छत्तीसगढ़ राज्य के स्थापना के बाद अइसन निर्णय पहली पइत ले गए हे। योजना के तहत 400 यूनिट के स्लैब म ज्यादातर उपभोक्ता सामिल होही अउ 400 यूनिट ले जादा खपत करइया उपभोक्ता मन ल घलोक एकर लाभ मिलही।
