रायपुर, छत्तीसगढ़ शासन महिला मन ल सशक्त, आत्मनिर्भर अऊ रोजगार उपलब्ध कराए के दिशा म सरलग ठोस कदम उठावत हे। इही कड़ी म आज राज्य विद्युत विभाग के गांधीनगर स्थित प्रशिक्षण केंद्र म विद्युत सखी मन ल विद्युत मीटर के रीडिंग, स्पॉट बिलिंग अऊ बिल वितरण काम के प्रशिक्षण देहे गीस।
सरगुजा जिला के कई ठन विकासखण्ड ले आए 11 विद्युत सखी मन ल आधुनिक तकनीक आधारित विद्युत मीटर के रीडिंग, स्पॉट बिलिंग अऊ बिल बांटे के काम के प्रशिक्षण दे गीस। ये सखी मन अब सितमबर 2025 ले उपभोक्ता मन के घर-घर जाके विद्युत मीटर के रीडिंग लेंहीं अऊ एंड्रॉयड मोबाइल अउ ब्लूटूथ थर्मल प्रिंटर के मदद ले मौका म ही स्पॉट बिलिंग करके बिल बांटे के काम करहीं।
महिला मन ल मिलही रोजगार के अवसर
मुख्यमंत्री श्री विष्णुदेव साय के हुकुम के मुताबिक ये काम राज्य विद्युत विभाग अऊ राष्ट्रीय ग्रामीण आजीविका मिशन (NRLM) के अंतर्गत सक्रिय स्व-सहायता समूह मन के महिला मन ल सौंपे गए हे। हर एक विद्युत सखी ल विभाग कोति ले लगभग 1000 घर मन के आवंटन करे जाही। विद्युत सखी ए आबंटित घर मन म जाके विद्युत मीटर के रीडिंग लेहीं अऊ एंड्रॉयड मोबाइल अउ ब्लूटूथ थर्मल प्रिंटर के माध्यम ले मौका म ही बिलिंग करके ओ मन ग्रामीण उपभोक्ता मन ल सुविधा पहुँचाहीं, संगेच अपन मेहनत के आधार म विद्युत बिलिंग काम ले कमीशन घलोक अर्जित करहीं।
सरगुजा जिला म 11 कलस्टर म होही शुरू
विद्युत विभाग कोति ले देहे गए जानकारी के मुताबिक प्रारंभिक चरण म सरगुजा जिला ल 11 अलग-अलग कलस्टर म विभाजित करे गए हे। ए कलस्टर मन म चुने गे विद्युत सखी मन घर-घर जाके मीटर रीडिंग करके स्पॉट बिलिंग करके बिल बांटे के काम करहीं। प्रशिक्षण के बाद सितंबर महिना ले ये अभियान शुरू हो जाही। ए योजना के उद्देश्य महिला मन ल सशक्त, आत्मनिर्भर अऊ आर्थिक रूप ले सक्षम बनाना हे। ग्रामीण अंचल के महिला मन अब केवल घर तक सीमित न रहके, तकनीक आधारित काम मन म घलोक दक्ष होही अऊ आय घलोक अर्जित करहीं।