स्व-सहायता समूह के महिला मन ल रोजगार ले जोड़े होवत हे सार्थक पहल
रायपुर, मुख्यमंत्री श्री विष्णु देव साय ह आज मुख्यमंत्री कैम्प कार्यालय बगिया म बगीचा विकास खंड के स्व-सहायता समूह मन के 21 बिजली सखी मन ल बिजली किट प्रदान करिन। ए मौका म मुख्यमंत्री ह सबो महिला मन ल बधाई अऊ शुभकामना दीन। उमन महिला मन ल बेहतर ढंग ले काम करे बर उंखर हौसला बढ़ाइन। ए अवसर म मुख्यमंत्री श्री साय के धर्मपत्नी श्रीमती कौशल्या साय घलोक उपस्थित रहिन।
जानबा हे कि जशपुर जिला के स्व-सहायता समूह के महिला मन ल रोजगार देके ऊंखर आय म बढ़ोतरी करे बर सार्थक पहल करे जात हे। बिजली सखी योजना पायलट प्रोजेक्ट के तहत जिला प्रशासन अऊ जनपद पंचायत बगीचा के संयुक्त प्रयास ले लागू करे जात हे। बिजली सखी अंतर्गत महिला मन ल प्रशिक्षण देहे गए हे। बिजली विभाग तीर मीटर रीडर के कमी के सेती उपभोक्ता मन के बिजली मीटर के नियमित रीडिंग नइ हो पावय। एखर से उपभोक्ता मन ल एक संग जादा बिजली बिल के भुगतान करना परत हे।
जिला प्रशासन ह स्व-सहायता समूह के महिला मन ल मीटर रीडिंग के प्रशिक्षण देके ओ मन ल बिजली सखी बनाए हे। बिजली सखी के मन नियमित रूप ले मीटर रीडिंग करहीं। ए पहल ले विद्युत उपभोक्ता मन ल नियमित बिजली के बिल मिलही, जेखर से ओ मन सही अउ किफायती बिल के भुगतान कर पाहीं।
संगेच एक घर म मीटर रीडिंग करे ले बिजली सखी ल 12 रूपिया बिजली विभाग ह भुगतान करही। एखर से समूह के महिला मन ल रोजगार उपलब्ध होही अऊ ओ मन ल नियमित आय होही। एखर से बिजली सखी के रूप म जनपद क्षेत्र म लखपति दीदी के संख्या घलोक बढ़ही। जशपुर म पायलट प्रोजेक्ट के तहत 21 महिला मन ल बिजली सखी बनाए गए हे। जिला म 300 महिला मन ल बिजली सखी बनाए के लक्ष्य रखे गए हे।