बीजापुर, 21 जुलाई 2021। जिला के बीजापुर ब्लाक अंतर्गत संतोषपुर निवासी फुलदई साहनी करीबन सालभर पहिली एनीमिया ले पीड़ित रहिस अऊ ओखर हिमोग्लोबिन स्तर 7 ग्राम रहिस। उहें वोकर वजन घलोक 35 किलोग्राम रहिस जेकर से वा ह पूरा कमजोर हो गए रहिस। फेर मुख्यमंत्री सुपोषण अभियान के तहत् आंगनबाड़ी केन्द्र म फुलदई ल मिले सरलग पौष्टिक आहार अऊ स्वास्थ्य जांच संग उपचार के फलस्वरूप अब फुलदई एनीमिया ले मुक्त हो गए हे। मुख्यमंत्री सुपोषण अभियान ले लाभान्वित होके स्वस्थ होए फुलदई साहनी बताइस कि एनीमिया ले पीड़ित होए के सेती वो ह अड़बड़ कमजोर रहिस अऊ घरेलू काम करे म जल्दी थक जात रहिस। ओखर एक बेटी पूर्वी साहनी साढ़े 4 साल के हे जेन आंबनबाड़ी केन्द्र ले लाभान्वित होवत हे, वो घलोक सुपोषण के दृष्टि ले मध्यम श्रेणी म हे। आंगनबाड़ी कार्यकर्ता अऊ स्वास्थ्य कार्यकर्ता के परामर्श ले फुलदई साहनी अऊ बेटी पूर्वी साहनी आंगनबाड़ी केन्द्र ले लाभान्वित होके नियमित तौर म गरम पौष्टिक भोजन संग अंडा, चिक्की, पौष्टिक बिस्किट जइसन अकतहा पौष्टिक आहार लेहे लगे हे। एखर संगेच सरलग स्वास्थ्य जांच अऊ उपचार ले बने होवत हें। ए सबो के सेती मार्च 2021 तक फुलदई साहनी अउ ओखर बेटी पूर्वी साहनी के स्वास्थ्य म बनेच सुधार आइस। अभी हाल म फुलदई के हिमोग्लोबिन स्तर 12 ग्राम होए संग वजन 46 किलोग्राम हो गए हे। उहें बेटी पूर्वी साहनी गंभीर कुपोषण ले बाहिर होके मध्यम श्रेणी म हे अऊ ओखर वजन 14 किलोग्राम हो गए हे। सुपोषण अभियान ले लाभान्वित होके स्वस्थ्य होए फुलदई कहिथे कि वो अब शारीरिक रूप ले सक्षम महसूस करत हे अऊ घरेलू काम के संग घर के खेती-किसानी काम म अपन पति राजू साहनी के सहयोग तको करत हे। फुलदई के कहना हे कि ओला अब थकान-कमजोरी जइसे कोनो समस्या नइ हे। अभी घलोक ओ ला नियमित तौर म आंगनबाड़ी कार्यकर्ता मन गृहभेंट करके पोषण अउ स्वच्छता अऊ साफ-सफाई के ध्यान रखे के समझाईश देवत हें। जेकर उपर वो पूरा अमल करत हे। वो शासन के ये जबर योजना बर सरकार के प्रति कृतज्ञता प्रकट करत कहिस कि ये योजना ले मोर अऊ मोर बेटी जइसे अड़बड़ अकन महिला अऊ लइका मन ल लाभ मिलत हे।
आप मन जानतेच हव के मुख्यमंत्री सुपोषण अभियान आंगनबाड़ी केन्द्र म लक्षित लइका मन, शिशुवती माता अउ गर्भवती माता, शाला त्यागी किशोरी बालिका अऊ एनीमिक महिला मन बर वरदान साबित होय हे ये योजना ले गरम भोजन, अकतहा पौष्टिक आहार, स्वास्थ्य अउ उपचार सेवा अऊ परामर्श सेवा लक्षित हितग्राही मन ल सुलभ कराए जात हे।
मुख्यमंत्री सुपोषण अभियान ले फुलदई ल मिलीस एनीमिया ले छुटकारा
