अब सामान्य श्रेणी म आईस दू बछर के श्रृष्टि
बीजापुर, जिला के गाँव तोयनार के दू बछर के लइका श्रृष्टि कुड़ियम आज सुग्घर अउ स्वस्थ जिनगी कोती डग भरत हे। एक समे म कुपोषण ले जूझत श्रृष्टि ल अब सामान्य श्रेणी म लाय म सफलता मिले हे। ए बदलाव ह आंगनबाड़ी कार्यकर्ता मन के सरलग उदीम, स्वास्थ्य विभाग के देख-रेख अउ महतारी मालती कुड़ियम के जागरूकता के फल आय।
श्रृष्टि ल कुपोषित पाय के बाद, आंगनबाड़ी कार्यकर्ता ह नियम ले ओखर घर जा-जा के ओखर महतारी ल पौष्टिक अहार, साफ-सफाई अउ लइका मन के देख-रेख के बारे म समझाइस। घर-घर जाके संतुलित भोजन, सुग्घर सफाई अउ लइका मन ल समे म पोसन देय के जानकारी दीस, जेकर ले परिवार म पोसन ल लेके चेत (जागरूकता) बाढ़ीस।
अच्चा इलाज बर श्रृष्टि ल पोषण पुनर्वास केंद्र (NRC) बीजापुर म भरती कराय गिस, जेमां 14 दिन तक डाक्टर अउ स्वास्थ्य करमी मन के देख-रेख म ओखर इलाज होइस। ए बीच म ओखर महतारी ल घलो लइका मन बर संतुलित अहार बनाय अउ सही पोसन देय के तरीका के बारे म सिखाया गिस।
RC ले लहुटे के बाद, महतारी मालती कुड़ियम ह स्वास्थ्य करमी मन के सलाह ल मानिस अउ नोनी ल नियम ले हरियर भाजी-पाला, मउसम के फर-फूल अउ संतुलित जेवन देय शुरू करिस। आंगनबाड़ी कार्यकर्ता डहर ले घलो समे-समे म श्रृष्टि के वजन अउ ऊँचाई ल नाप के ओखर निगरानी करे जात रिहिस।
सरलग देख-रेख अउ सही पोसन के फल हे के श्रृष्टि के स्वास्थ्य म बड़ सुधार आइस अउ ओला कुपोषण के घेरा ले निकाल के सामान्य श्रेणी म लाय म सफलता मिल गिस।
