बीजापुर म राज्य सरकार के महत्वाकांक्षी योजना ले गांव वाले मन ल मिलत हे आर्थिक लाभ

बीजापुर, राज्य सरकार के महत्वपूर्ण सुराजी गांव योजना के तहत गांव मन म गौठान के जुन्ना परम्परा ल फेर से कायम करे के उददेश्य ले गांव वाले मन अऊ चरवाहा मन ल खुश रखे बर ये योजना के शुभारंभ करे गए हे। बीजापुर जिला के ग्राम पंचायत ईटपाल के मांझीगुडा म बने आर्दश गोठान म गांव वाले मन ह अपन-अपन मवेसी मन ल सुरक्षित रखे पानी पियाए अऊ इलाज बर लाय लगे हे। ये गौठान के संचालन के जवाबदारी गांव के तुलसी माता स्व-सहायता समूह ल सौंपे गए हे, अऊ गोठान म मवेसी मन के देखभाल अउ नियमित उपचार करे जात हे। चरवाहा श्री चैतुराम साहनी ह बताइस कि अभी गोठान म किसान मन कोति ले गाय-बइला ल लाथन। पाछू कुछ साल पहिली चरवाही के काम बंद हो गे रहिस। फेर अब चरवाहा के काम मिले ले घर परिवार ल चलाय म आसानी हो गए हे।
किसान श्री सीताराम मांझी ह बताइस कि मुख्यमंत्री ह गोठान बनाके जुन्ना परम्परा ल फेर से लागू करे ले गांव वाले मन ल सुविधा अऊ लाभ मिले लगे हे। वो ह बताइस के अभी रोजाना करीबन 250 ले 270 गाय-बइला गोठान म आथे। अभी गौठान म पानी अऊ उपचार के व्यवस्था हे। पशु चिकित्सा विभाग के डॉक्टर बीमार मवेसी मन के सरलग मुफ्त म इलाज करत हे। उमन बताइस कि गोठान ले लगे करीबन 01 एकड़ 50 डिसमिल जमीन म मवेसी मन बर ज्वार चारा लगाए गए हे। ईटपाल मांझीगुडा के गोठान करीबन 03 एकड़ जमीन म बनाए गए हे। मांझीगुडा के किसान श्री लच्छुराम साहनी ह बताइस कि गोठान बने ले गांव वाले मन ल सुविधा हो गए हे। इहां मवेसी मन बर पानी अऊ उपचार दुनों के सुविधा हे। उमन बताइस कि अभी तो चारो कोति बहुत चारा मिलत हे। फेर गर्मि मन म गोठान म पानी अऊ चारा के फायदा मवेसी मन ल मिलही। वो ह बताइस कि मुख्यमंत्री ह गांव म गोठान के निर्माण करके मवेसी मन बर एक बड़का पहल करे हें। किसान मन ह बताइस कि गोठान म गाय-बइला रखे के सुविधा हो गए त हम मनखे मन ल आन काम करे बर घलोक बहुत समय मिलत हे। बहुत समय मिले ले सब्बो काम काज घलोक कर पावत हें। गोठान म तुलसी माता स्वहायता समूह कोति ले वर्मी कम्पोस्ट खाद बनाय जावत हे। एखर बर गोठान म 04 टैंक बनाय गए हे। जेमां ले 04 टैंक भर गे हे। तुलसी माता स्वहायता समूह के अध्यक्ष श्रीमती लक्ष्मी साहनी ह बताइस कि कृषि विभाग ले गेंगरूवा मिले हे। ओला टैंक म डाले गए हे। उमन बताइस कि वर्मी कम्पोस्ट बनाए जात हे। तियार करे खाद ल बेचे जाही। तुलसी माता स्वहायता समूह के अध्यक्ष अऊ सदस्य मन कोति ले बताए गीस कि वर्मी कम्पोस्ट बनाए ले हमार आर्थिक स्थिति म सुधार आ जाही। उमन कहिन कि वर्मी कम्पोस्ट ले अच्छा आमदनी होही ।