नक्सली मन इंजीनियर ल धर के ले गीन जंगल, वोकर पत्नी छोड़ाए बर गीस जंगल

बीजापुर, जिला म बनत सड़क के जांच करे गए एक इंजीनियर ल नक्सली मन ह अगवा कर लेहे हें। वोखर संग म एक चपरासी घलोक रहिस। दिन म मंझनिया एक बजे निकले के बाद रात तक नइ लहुटे म उमन के तलाश करे गीस, फेर कोनो सुराग नइ मिलीस। अब इंजीनियर के तलाश म वोखर पत्नी ह अपन लइका ल लेके जंगल निकल गे हे। वो ह नक्सली मन ले गोहार लगाए हे के वो वोखर पति ल सकुशल छोड़ दव। वो ह नक्सली मन ले गोहार लगात कहे हे के एक बहिनी के फरियाद सुनव अऊ मानवता के परिचय देवव। मोर पति एक अच्छा इंसान हे। जब ले हमला वोखर अगवा होए के खबर मिले हे, तब ले हमन कुछ नइ खाए-पिए हन। मोर 3 साल के बेटा हे, वो घलोक अपन पापा ल सोरियावत हे। मोर मासूम बेटा के मूड़ी म वोकर पिता के साया सलामत रहय, ये एक मां अऊ पत्नी के फरियाद हे।
जानबा हे के चपरासी लक्ष्मण परतागिरी सकुशल अपन घर पहुंच गए हे। चपरासी के कहना हे के दुनों ल अलग-अलग रखे गए रहिस। जंगल म जनअदालत लगाए गए रहिस ओखर बाद ओला छोड़े गीस। सब इंजीनियर ल नइ छोड़े गए हे। एती पुलिस सब इंजीनियर के तलाश म जुटे हे। जिला के एसपी कमलोचन कश्यप के बताती सब इंजीनियर के तलाश कारे जात हे। सम्भावना हे के एक-दू दिन म नक्सली मन ओ ल रिहा कर देहीं।
सब इंजीनियर के पत्नी जेकर नाव अर्पिता हे तेन ह मनकेली इलाका म अपन लइका के संग नक्सली मन ले मिले रवाना हो गए हे। आप मन जानतेच होहू के गोरना मनकेली नक्सली मन के आधार वाला क्षेत्र माने जाथे अऊ ये इलाका म सरकारी निर्माण के लगातार विरोध करे जाथे। माने जात हे के दुनों कर्मी मन ल इही पाए के अगवा करे गए हे असे लागत हे।