रायपुर, मुख्यमंत्री श्री भूपेश बघेल काली संझा राजधानी रायपुर के आउटडोर स्टेडियम म 5 मार्च ले आयोजित दू दिन के राष्ट्रीय सुपरक्रास प्रतियोगिता 2022 अऊ फ्री स्टाइल मोटोक्रास प्रतियोगिता म सामिल होइन। प्रतियोगिता के आयोजन खेल अऊ युवा कल्याण विभाग अऊ छत्तीसगढ़ मोटर स्पोर्ट्स एसोसिएशन कोति ले संघरा करे गए रहिस। मुख्यमंत्री दाऊ भूपेश बघेल स्टेडियम म खुदे फटफटी चलात दमक के मंच तक पहुंचिन अऊ सबो बाईकर्स अऊ खेल प्रेमी दर्शक मन के भरपूर उत्साहवर्धन करिन। प्रतियोगिता म राष्ट्रीय अऊ अंतर्राष्ट्रीय स्तर के बाईक राईडर्स के साहसिक अऊ हैरत अंगेज प्रदर्शन ले दर्शक रोमांचित हो उठिन।
ये बेरा म मुख्यमंत्री श्री बघेल ह सम्बोधित करत कहिन कि राष्ट्रीय सुपरक्रास प्रतियोगिता 2022 अऊ फ्री स्टाईल मोटोक्रास के आयोजन रायपुर म होइस, ये ह देश म पहली पइत ये जब कोनो आउटडोर स्टेडियम म फ्लड लाईट म आयोजित होवत हे। ये हमार प्रदेश बर गौरव के विसय ये। राज्य गठन के बाद ले ही छत्तीसगढ़ मोटर स्पोर्टस् ह साल 2003 ले अब तक कई ठन राष्ट्रीय स्तर के प्रतियोगिता अऊ अंतर्राष्ट्रीय स्तर के रैली के सफल आयोजन करे हे।
उमन कहिन कि ये आयोजन सबले अलग अऊ रोमांचक अऊ महत्वपूर्ण ये। ये प्रकार के आयोजन राज्य के जनता अऊ खिलाड़ी मन म मोटर स्पोर्ट्स ल बढ़ावा देना, ओ मन ल प्रोत्साहित करना अऊ ये बताना कि ये प्रकार के खेल प्रतियोगिता के आयोजन बर अंतर्राष्ट्रीय स्तर के संगें-संग भारत अऊ छत्तीसगढ़ राज्य घलोक सक्षम हे। प्रतियोगिता के असली उद्देश्य युवा मन ल रोड रेज अऊ आम रस्ता म स्टंट आदि ले रोकना अऊ एक विशेष स्थल म उमन ल मौका देके अपन प्रतिभा के प्रदर्शन करे के अवसर देना हे। अंतर्राष्ट्रीय स्तर म अउड़बड़ लोकप्रिय, रोमांच, गति अऊ साहस ले भरपूर ये विशेष खेल ल छत्तीसगढ़ म घलोक स्थापित करना, छत्तीसगढ़ मोटर स्पोर्टस् एसोसिएशन के इही उद्देश्य रहे हे। ये मां हमर सरकार पूरा सहयोग प्रदान करत हे।
ये बेरा म उच्च शिक्षा अऊ खेल अऊ युवा कल्याण मंत्री श्री उमेश पटेल, सांसद श्रीमती छइंहा वर्मा, अध्यक्ष छत्तीसगढ़ गृह निर्माण मंडल श्री कुलदीप जुनेजा, महापौर श्री एजाज ढेबर, अध्यक्ष छत्तीसगढ़ राज्य महिला आयोग डॉ. किरणमयी नायक, रायपुर विकास प्राधिकरण के अध्यक्ष श्री सुभाष धुप्पड़, नगर निगम के सभापति श्री प्रमोद दुबे, मुख्यमंत्री के सलाहकार श्री प्रदीप शर्मा, मुख्य सचिव श्री अमिताभ जैन, अपर मुख्य सचिव श्री सुब्रत साहू अऊ आन जनप्रतिनिधि अऊ खेल प्रेमी अड़बड़ झन म उपस्थित रहिन।
रईपुर म मुख्यमंत्री कुदाईन फटफटी: छत्तीसगढ़ म मोटर स्पोर्ट्स ल बढ़ावा देहे पहल
