जगदलपुर, 11 जनवरी 2021। शहर म सक्रिय मोटरसाइकिल चोर गिरोह के दू सदस्य ल कोतवाली पुलिस ह रविवार के पकड़े हे। पुलिस ह गिरोह ले चोरी के 6 मोटरसाइकिल घलो बरामद करे हे। बताये जावत हे कि ये चोर अतना शातिर रहिस कि वाहन चोराये ले पहली उंखर नम्बर प्लेट म कीचड़ लगा देवत रहिस, जेखर ले चोरी के गाड़ी मन के पहिचान छुपे रहे। मामला म कोतवाली टीआई एमन साहू ह बतइन कि कोतवाली क्षेत्र म गुंडा बदमाश अऊ अपराधी मन के धरपकड़ बर अभियान चलाये जावत हे। कोतवाली क्षेत्र म गाड़ी चोरी के कुछ घटना होय रहिस। मुखबिर ले सूचना के बाद ये सिलसिला म कुछ संदिग्ध मनखे मन ऊपर निगरानी रखे गए रहिस। ये संदिग्ध मनखे म ले मेटगुड़ा निवासी गौरव वर्मा अऊ महारानी वार्ड निवासी अभिजीत सिंह ले पूछताछ करे गीस। कड़ाई ले पूछताछ म उमन संजय बाजार, बालाजी वार्ड, नयापारा आकांक्षा होटल तीर अऊ नवाबस स्टैण्ड के तीर ले बुलेट, स्कूटी, एक्टिवा जइसे गाड़ी चोरी करे ल स्वीकार करिस। आरोपी मन के तीर ले 6 दुपहिया गाड़ी जब्त करिन। ये गाड़ी मन के कीमत करीब चार लाख रुपिया आंके गए हे। दुनो आरोपी मन ल कोर्ट म पेश करे गीस, जिहाँ ले उमन ल जेल भेज देहे गए हे।
बाइक चोर गिरोह के दू सदस्य पकड़इस, जब्त करिन 6 मोटरसाइकिल
