बिलाईगढ़, बिलाईगढ़ के चर्चित हत्याकांड के आज खुलासा हो गीस। मामला म 3 आरोपी मन के गिरफ्तारी होए हे। आरोपी मन म 21 बछर के लोमेश साहू के लास ल दू दिन तक नहानी म लुकाए रखे रहिन। आरोपी मन ह पुलिस ल गुमराह करे बर झूठ के कहानी गढ़े रहिन। आरोपी हिमांशु राकेश, रवि राकेश अऊ जय नारायण देवांगन के कब्जा ले घटना म उपयोग करे गए डोरी अऊ बाइक जब्त करे गए हे। आरोपी मन के गिरफ्तारी के बाद पुलिस आगू के कार्रवाई करत हे।
आप मन जानतेच हव के बिलाईगढ़ के ये मर्डर ले पुलिस घलोक परेशान रहिस। कई दिन ले पुलिस मामला के तह तक जाय के कोसिस करत रहिस, फेर पुलिस अऊ उलझत जात रहिस। युवक के लापता होए के रहस्य सुलझतेच नइ रहिस। रहस्यमयी ढंग ले 3 दिन बाद युवक के लाश बरामद होइस। पुलिस के मानना रहिस के युवक के हत्या करके लाश कहूं लुका देहे गए होही। ओखर बाद आरोपी मन ह तालाब म कूदे वाले कहानी गढ़े होहीं। बाद म दबाव के चलते लाश ल फेर तालाब म फेंके गए होही। लाश बरामद होए के बाद मृतक युवक के शव अऊ आसपास के मुआयना करे गीस। मृतक युवक लोमेश साहू के शरीर म कई जगा चोट के निशान मिले रहिस। तालाब के किनारे गाड़ी के चक्का के निशान घलोक मिले रहिस। गाड़ी के चक्का के निशान ले मामला पुख्ता होत नजर आत रहिस कि आरोपी मन ह मृतक युवक के लाश कोनो अऊ जगा ले लाके तालाब म फेंके होहीं।
पुलिस ह एखर पहिली बताए रहिस कि दू आरोपी मन ल पूछताछ बर हिरासत म लेहे गए हे। संदेही युवक मन ह पुलिस ल बयान देहे रहिन कि ओ मन लोमेश साहू ल प्रेम प्रसंग मामला के चलते मारपीट करे बर तालाब तीर ले गे रहिन। मारपीट के समय लोमेश साहू ऊंखर चंगुल ले भाग गीस। आरोपी मन के चंगुल ले भागके लोमेश साहू ह तालाब म कूद दीस। संदेही मन के ये बयान ल आधार बनाके बिलाईगढ़ पुलिस ह स्टेट डिजास्टर रिस्पांस फ़ोर्स (एसडीआरएफ) के टीम बलाके तालाब म लापता युवक के तलाश करवाईस। शव 48 घंटा म घलोक नइ मिलीस। बाद म वाटर कैमरा के घलोक मदद लेहे गीस। ये मां घलोक गोताखोर थक हार गें। तालाब म लोमेश साहू के शव बरामद ही नइ हो सकिस।
बाद म पुलिस ह दुनों संदेही मन ल छोड़ दीस। संदेही मन ल छोड़े के बाद पुलिस ह तालाब के आसपास के फेर निगरानी करिस। इही बीच लोमेश साहू के लाश तालाब म उफले मिलीस। एखर बाद पुलिस ह दुनों संदेही मन ल फेर हिरासत म ले लीस। मामला के आज पर्दाफाश होइस। आरोपी मन ह गुनाह कबूल कर लेहे हें।
बिलाईगढ़ के मर्डर मिस्ट्री: नहानी म लुका के रखे रहिन लास, बाद म फेंक दीन तरिया म
