बिलासपुर, 21 अप्रैल 2020। लोधीपारा सरकंडा के सुमन कंसारी सामान्य दिन जइसे अपन दिनचर्या व्यतीत करत हे। ओला कोरोना वायरस संक्रमण के रोकथाम अऊ बचाव बर प्रदेश म लागू लॉकडाउन के कोनो खास असर नइ परे हे। ओला घरे म ही आंगनबाड़ी केन्द्र के सुविधा उपलब्ध हे। सुमन के 5 महिना के नोनी हे, आंगनबाड़ी कार्यकर्ता ओला घरे म आके रेडी टू ईट (सूखा राशन) देवत हें।
ओला आंगनबाड़ी केन्द्र तक जाना नइ परत हे। अइसनहे शिशुवती ममता, नेहा श्रीवास, ज्योति साहू अउ गर्भवती विनीता राय ह घलोक प्रदेश के मुख्यमंत्री ल धन्यवाद देहे हें। उमन कहिन के समय म टीकाकरण अउ पूरक पोषण आहार के सुविधा घरे म मिले हे। लइका मन के पूरा विकास बर डिजिटल प्लेटफार्म के माध्यम ले अभिभावक मन तक सटीक सूचना प्रेषित करे जात हे। जानबा हे के लॉकडाउन के समय आंगनबाड़ी केन्द्र के संचालन बंद हे। आंगनबाड़ी केन्द्र मन के बंद होए ले शिशुवती अउ लइका मन के स्वास्थ्य अऊ प्रारंभिक शिक्षा प्रभावित झन होवय, एखर बर प्रदेश के मुख्यमंत्री श्री भूपेश बघेल के निर्देश के मुताबिक महिला अउ बाल विकास विभाग ह व्यापक प्रबंध करे हे।