डीजीसीए कोति ले बिलासपुर एयरपोर्ट ला ऑल वेदर ऑपरेशन के मंजूरी मिले ले छत्तीसगढ़ के विकास ला मिलही नवा रफ़्तार : मुख्यमंत्री श्री विष्णु देव साय

रायपुर, भारत सरकार के नागर विमानन महानिदेशालय (DGCA) ह बिलासपुर एयरपोर्ट ला 3C-VFR ले 3C-All Weather Operations (IFR) श्रेणी में अपग्रेड करे के मंजूरी दे देहे हे। ए बड़का फैसला ऊपर अपन बात रखत हुए मुख्यमंत्री श्री विष्णु देव साय ह एला छत्तीसगढ़ के विकास के डहर में एक जरूरी अऊ दूरगामी कदम बताए हें।
मुख्यमंत्री श्री साय ह कहिन के ए मंजूरी के बाद अब बिलासपुर एयरपोर्ट में सबो मौसम म जहाज मन के चलना संभव हो पाही। एखर से क्षेत्रीय कनेक्टिविटी ला मजबूती मिलही अऊ यात्री मन ला अऊ जादा सुरक्षित अऊ सुविधा वाले हवाई सेवा मिल सकही।
मुख्यमंत्री श्री साय ह कहिन के ऑल वेदर ऑपरेशन के सुविधा मिले ले बिलासपुर अऊ ओखर तीर-तखार के इलाका मन म व्यापार, उद्योग अऊ पर्यटन के काम ला नवा रफ़्तार मिलही। ए फैसला औद्योगिक निवेश ला बढ़ावा देय के संग-संग रोजगार के नवा मौका बनाय में घलो मददगार साबित होही।
मुख्यमंत्री श्री साय ह ए जरूरी फैसला बर प्रधानमंत्री श्री नरेंद्र मोदी अऊ केंद्रीय नागरिक उड्डयन मंत्री श्री किंजरापु राममोहन नायडू के प्रदेश के जनता कोति ले आभार मानिन। ओमन कहिन के प्रधानमंत्री श्री मोदी के रद्दा देखाय अऊ सहयोग ले छत्तीसगढ़ म आधुनिक बुनियादी ढाँचा के तेजी ले विस्तार होवत हे, जेहा राज्य ला विकास के नवा ऊँचाई तक ले जावत हे।
मुख्यमंत्री श्री साय ह भरोसा जताइन के ए उपलब्धि बिलासपुर एयरपोर्ट के संगे-संग पूरा छत्तीसगढ़ ला आर्थिक, सामाजिक अऊ औद्योगिक विकास के नवा दिशा देही अऊ प्रदेश ला देश के विमानन नक्शा में अऊ जादा मजबूत बनाही।