बिलासपुर, बीड़ी नइ देहे म ममा ह भांचा के पिटाई कर देहे हे। मारपीट ले घायल भांचा ह एखर शिकायत तोरवा थाना म करे हे। पुलिस जुर्म दर्ज करके मामला के जांच करत हे। जानबा हे के तोरवा क्षेत्र के बुधवारी बाजार मुर्राभाठा म रहइया भोला डांडेकर हलवाई के काम करथे। बुधवार के रात ओ ह काम म गए रहिस। रात 11 बजे ओ ह काम ले लहुट के अपन मकान के दरवाजा खोलत रहिस। वोतके बेरा म उहां परोस म रहइया आनंद वर्मा आ गे। वो भोला के रिश्ता म ममा लगथे। आनंद ह भोला ले पीए बर बीड़ी मांगिस। ये म भोला ह बीड़ी नइ सये कहिस। इही बात ल लेके ओ ह अपन भांचा ले गाली-गलौज करत जान से मारे के धमकी दीस।
एकर विरोध करे म ओ ह अपन भांचां के मूड़ी म लकड़ी के बत्ता ले वार कर दीस। भांचा के चिल्लाए ले आसपास के मनखे मन ह बीच-बचाव करिन। एखर बाद घायल ह घटना के शिकायत तोरवा थाना म करे हे। घायल के शिकायत म पुलिस जुर्म दर्ज करके मामला के जांच करत हे।
बीड़ी नइ देहे म ममा ह भांचा ल कुटकुट ले पीटिस
