बिलासपुर, 29 दिसम्बर 2020। स्लम क्षेत्र मन म रहइया श्रमिक अऊ गरीब मन बर चालू करे गए मुख्यमंत्री स्लम स्वास्थ्य योजना ले ओ मन ल घर के तीरेच म मुफ्त ईलाज अऊ दवा मिलत हे। ये योजना ऊंखर बर वरदान हे। ये कहना हे रोजी मजूदरी करके अपन जीवन यापन करइया शिव मंगल दास बंजारे के जऊन ह शिविर म अपन ईलाज कराए हे। पाछू नवम्बर महिना ले अब तक 176 शिविर मन के माध्यम ले 12 हजार ले जादा गरीब मन के मुफ्त ईलाज ये योजना के तहत करे गए हे।
बिलासपुर शहरी क्षेत्र के वार्ड क्र. 63 म मुख्यमंत्री स्लम स्वास्थ्य योजना के तहत् लगाये गये शिविर म अपन ईलाज कराए पहुंचे शिवमंगल खुदे एक प्राइवेट अस्पताल म मजदूर के काम करथे फेर ओ अस्पताल म ईलाज बर ओला पइसा खर्च करे ल परथे। इहां शिविर म ओखर मुफ्त म ईलाज होइस। ओखर बीपी अऊ शुगर के जांच घलोक होइस अऊ निशुल्क दवा मिलीस। देवनगर कोनी निवासी 50 वर्षीय महिला श्रीमती पुष्पा बेंदरे ल हाई ब्लड प्रेशर अऊ माड़ी म परेशानी रहिस। शिविर म ओखर ईलाज करे गीस अऊ बीपी, शुगर जांच करके डाक्टर ह दवाई दीस। श्रीमती पुष्पा ह बताइस के अस्पताल जाय म ओला घंटों अगोरा करना परत रहिस फेर इहां ओला आसानी ले ईलाज मिल गीस। अइसनहे 34 वर्षीय महिला श्रीमती पुष्पा कश्यप ल सर्दी के संग खुजली के परेशानी हे संगेच ओखर लइका घलोक सर्दी, बुखार ले पीड़ित रहिस। मां अऊ लइका के इहां ईलाज होइस। श्रीमती उर्वशी चतुर्वेदी हाथ पैर म झुनझुनी अऊ कमर दर्द के ईलाज कराए आइस ओला दवाई के संगे संग टॉनिक घलोक देहे गीस। ओ हर बताइस के पहिली वो प्राइवेट अस्पताल म ईलाज कराइस जिहां ओखर हजारो रूपिया खर्च होइस फेर ठीक नइ हो पाइस। शिविर म होए ईलाज म ओ हर संतोष जताइस।
बिलासपुर शहर के कई ठन वार्ड मन म योजना के तहत् लगइया शिविर मन म सैकड़ों के संख्या म मनखे अपन बीमारी मन के निःशुल्क ईलाज कराए पहुचत हें। ओ मन एखर बर मुख्यमंत्री श्री भूपेश बघेल के प्रति हृदय ले आभार घलोक व्यक्त करत हें। छत्तीसगढ़ सरकार कोति ले स्लम क्षेत्र मन म रहइया मनखे मन ल उंखर बस्ती, घर, दरवाजा तक पहुंचके गुणवत्तापूर्ण निःशुल्क स्वास्थ्य परामर्श, उंखर जांच अऊ दवाईया उपलब्ध कराए के संग कई ठन बीमारी मन के ईलाज घलोक करत हें। योजना के तहत डॉक्टर, नर्स अऊ आन मेडिकल स्टॉफ के संग दवाई के मेडिकल मोबाईल यूनिट श्रम क्षेत्र मन म पहुंचत हे। कोरोना संक्रमण ल देखत सामाजिक दूरी के पालन अऊ मास्क, सेनेटाईजर के व्यवस्था के संग उहां के निवासी मन ल स्वास्थ्य सुविधा उपलब्ध करावत हे। नगर निगम बिलासपुर अंतर्गत पाछू नवम्बर महिना ले वार्ड अऊ बस्ति मन म शिविर लगाके मनखे मन के ईलाज करे जात हे। अब तक 176 शिविर के माध्यम ले 12 हजार 300 ले जादा मरीज मन के मुफ्त जांच अऊ ईलाज करे गए हे। एमां ले 2 हजार 300 मरीज मन के लैब जांच घलोक करे गीस, 12 हजार ले जादा मरीज मन ल मुफ्त दवा बांटे गीस। लाभान्वित मरीज मन म ले 7 हजार 800 ले जादा मरीज श्रमिक वर्ग के हें।
