- अविभाजित मध्यप्रदेश के पहिली मंत्री स्वर्गीय श्री बी.आर.यादव के प्रतिमा के अनावरण
- मुख्यमंत्री ह नगर निगम क्षेत्र म 3 करोड़ 59 लाख रूपिया ले जादा के काम मन के करिन लोकार्पण
- विकास काम मन बर नगर निगम बिलासपुर ल 10 करोड़, नगर पालिक रतनपुर, तखतपुर अऊ तिफरा ल एक-एक करोड़ अऊ नगर पंचायत मन ल 50-50 लाख देहे के करिन घोषणा
बिलासपुर, मुख्यमंत्री श्री भूपेश बघेल ह आज बिलासपुर के बृहस्पति बाजार म स्थापित अविभाजित मध्यप्रदेश के पहिली मंत्री स्व.श्री बी.आर.यादव के आदमकद प्रतिमा अनावरण के संगेच नगर निगम क्षेत्र म 3 करोड़ 59 लाख रूपिया के काम मन के लोकार्पण करिन। उमन विकास काम मन बर बिलासपुर नगर निगम ल 10 करोड़ रूपिया देहे के घोषणा करिन। एखर ले अकतहा नगर पालिका परिषद रतनपुर, तखतपुर अऊ तिफरा ल एक-एक करोड़ अऊ नगर पंचायत कोटा, बोदरी, बिल्हा, सकरी, मल्हार, पेण्ड्रा, सिरगिट्टी, गौरेला ल 50-50 लाख रूपिया देहे के घलोक घोषणा करिन।
मुख्यमंत्री श्री भूपेश बघेल ह कार्यक्रम म उपस्थित मनखे मन ल संबोधित करत कहिन कि छत्तीसगढ़ राज्य बनाए ले लेके सामाजिक आंदोलन, विकास के काम मन म स्व.श्री यादव के योगदान भुलाए नइ जा सकय। उमन बिलासपुर के बहतराई म नवनिर्मित अंतर्राष्ट्रीय स्टेडियम के नाम स्व.श्री यादव के नाम म करे के घोषणा करिन। अविभाजित मध्यप्रदेश के पहिली मुख्यमंत्री श्री दिग्विजय सिंह ह अपन संबोधन म कहिन कि छत्तीसगढ़ राज्य बने के बाद जऊन जइसन परिवार के विभाजन होए म दुख होथे, उही दुख उमन महसूस करिन फेर खुसी हे कि राज्य बने के बाद छत्तीसगढ़ म तेजी ले प्रगति होये हे। नैसर्गिक संसाधन मन ले भरपूर ये राज्य ह प्रगति कोति सरलग कदम बढ़ाए हे। उमन विश्वास व्यक्त करिन कि मुख्यमंत्री के नेतृत्व ले छत्तीसगढ़ म उत्तरोत्तर विकास होही।
कार्यक्रम के अध्यक्षता करत लोक निर्माण मंत्री श्री ताम्रध्वज साहू ह कहिन कि स्व.श्री यादव सीधा, सहज, सरल व्यक्तित्व के मालिक रहिन। श्री साहू ह कहिन कि प्रभारी मंत्री होए के नाते ओ मन ये प्रयास करहीं कि बिलासपुर म विकास के एक अच्छा वातावरण निर्मित होवय। कार्यक्रम म विधानसभा अध्यक्ष श्री चरणदास महंत ह अपन संबोधन म कहिन कि बिलासपुर अऊ छत्तीसगढ़ के विकास बर स्व. श्री यादव ह जऊन काम करे हें, ऊंखर काम ल आगू बढ़ाबोन। उमन प्रदेश म सबो धर्म, समुदाय, वर्ग बर सौहार्द्र के वातावरण निर्मित करे हें। उंखर व्यक्तित्व अऊ कृतित्व विशाल रहिस। कार्यक्रम ल बिलासपुर के विधायक श्री शैलेष पाण्डेय, स्व.यादव के पुत्र श्री कृष्ण कुमार यादव, श्री अटल श्रीवास्तव ह घलोक संबोधित करिन।
कार्यक्रम म मुख्यमंत्री श्री भूपेश बघेल ह प्रधानमंत्री गृह योजना अंतर्गत 27 हितग्राही मन ल 15 लाख रूपिया ले जादा के राशि पहिली किस्त के रूप म प्रदान करिन, संगेच राष्ट्रीय शहरी आजीविका मिशन के तहत 18 समूह मन ल 1 लाख 80 हजार रूपिया के आवर्ती निधि अऊ दू हितग्राही मन ल प्रधानमंत्री गृह योजना के स्वीकृति पत्र प्रदान करिन।
कार्यक्रम म स्वर्गीय श्री यादव के धर्मपत्नी श्रीमती शांति देवी यादव, तखतपुर विधायक श्रीमती रश्मि सिंह ठाकुर, नगर निगम के महापौर श्री किशोर राय, विधायक श्री मोहित केरकेट्टा, श्री धरमजीत सिंह ठाकुर, श्री रामकुमार यादव, पूर्व सांसद श्रीमती कमला मनहर, श्री रामाधार कश्यप, श्री रामेश्वर निखरा, नगर निगम के नेता प्रतिपक्ष श्री शेख नजरूद्दीन, पूर्व महापौर राजेश पाण्डेय, कलेक्टर डॉ. संजय अलंग, राउत नाचा महोत्सव समिति के अध्यक्ष श्री कालीचरण यादव, नगर निगम के पार्षद, गणमान्य नागरिक अड़बड़ झन उपस्थित रहिन।
