सब्जी के उत्पादन ले बाढि़स महिला समूह के आमदनी : आय के संग अब बाढ़े लगे हे आत्मविश्वास

बिलासपुर, 19 नवम्बर 2020। प्रदेश सरकार के महत्वाकांक्षी सुराजी गांव योजना के अंतर्गत बिलासपुर जिला के मस्तूरी विकासखण्ड के ग्राम पंचायत वेद परसदा के महिला मन समूह बना के सब्जी उत्पादन के काम शुरू करे हें। जेखर से न केवल ओ मन ल अकतहा आय होवत हे भलुक उंखर आत्मविश्वास घलोक अब बाढ़े लगे हे। श्री राधाकृष्ण स्व सहायता समूह के महिला मन साग-भाजी के खेती करके अपन आर्थिक गतिविधि मन ल बढ़ावत हें। समूह के अध्यक्ष श्रीमती ललिता पटेल ह बताइस के हमार समूह म 10 महिला सदस्य हे। सब्जी उत्पादन काम करे के प्रेरणा हमला पंचायत अऊ ग्रामीण विकास विभाग के अधिकारी मन ह देहे हें। उमन हमला समूह ले जुड़के आर्थिक लाभ लेहे के संबंध म परखर प्रशिक्षण अऊ जानकारी देहे हें। श्रीमती पटेल ह बताइस के पहिली हमन ल ये काम के संबंध म भोरहा रहिस के हमन कइसे ये काम ल कर पाबो, फेर अधिकारी मन सरलग हमर काम ल पंदोली देहे गीस। ऊंखर बढ़ावा देहे के ही परिणाम हे के आज हम सफलतापूर्वक ये काम ल कर पावत हन।
राधाकृष्ण समूह के सचिव श्रीमती पुष्पा साहू ह बताइस के हमन 1.5 एकड़ म सब्जी उत्पादन करत हन। हमन बाड़ी म गोभी, टमाटर, मूली, बैगन, भिंडी, बर्रे भाजी अऊ तिवरा भाजी लगाए हन। पऊर साल हमन ल ए सब्‍जी मन ल बेचे ले 5 हजार के अकतहा आमदनी होए रहिस। ये साल एखर ले घलोक जादा आमदनी होए के भरोसा हे। समूह के महिला मन के बताती ये सुराजी योजना ले हम महिला मन ल आय के नवा जरिया मिले हे। आर्थिक रूप ले सक्षम होए ले हमला परिवार चलाय म घलोक सहायता मिलत हे। भविष्य म घलोक हम अपन आर्थिक गतिविधि मन के विस्तार कर पाबोन। महिला समूह मन ह 5 एकड़ म पशु विभाग के मदद ले चारागाह विकास के काम घलोक करे हें। 2.5 एकड़ म नेपियर घास लगाए हें। चारागाह विकास ले घलोक ओ मन ल अकतहा आमदनी होए हे।