रायपुर, मुख्यमंत्री श्री विष्णुदेव साय ह बिलासपुर जिला तीर होए ट्रेन दुर्घटना म गहरा शोक व्यक्त करे हें। उमन एला बहुत दुखद घटना बताइन अऊ कहिन के ए दुर्घटना म प्रभावित परिवार मन के प्रति राज्य सरकार पूरा संवेदना के संग ठाढे़ हे।
मुख्यमंत्री श्री साय ह दूरभाष म बिलासपुर जिला कलेक्टर ले बात करके घटना के परखर जानकारी लेत प्रभावित मन के सहायता के निर्देश दीन। उमन कहिन के घायल मन के तुरंते चिकित्सा सुविधा ठउका करे जाय अऊ प्रभावित परिवार मन ल हरसंभव सहयोग देहे जाए।
मुख्यमंत्री ह सोशल मीडिया प्लेटफार्म एक्स म जानकारी दीन के रेलवे प्रशासन अऊ जिला प्रशासन के टीम तुरंत मौका म पहुंच गए हे अऊ राहत-बचाव काम मन म जुटे हे। घायल मन के उपचार खातिर जम्मो जरूरी चिकित्सा सुविधा अऊ संसाधन उपलब्ध कराए जात हे। उमन कहिन के राज्य सरकार पूरा तत्परता अऊ संवेदनशीलता के संग स्थिति उपर नजर रखे हे।
मुख्यमंत्री श्री विष्णुदेव साय ह ए दुर्घटना म जान गंवाने वाले यात्री मन के प्रति गहरी संवेदना व्यक्त करे हें अऊ ऊंखर परिजन मन ल ए दुखद समय म धैर्य देहे खातिर ईश्वर ले प्रार्थना करे हें। उमन घायल मन के लउहे स्वास्थ्य लाभ के कामना करे हें।
मुख्यमंत्री विष्णुदेव साय ह बिलासपुर तीर होए ट्रेन दुर्घटना म गहरा दु:ख व्यक्त करिन
