डबल इंजन सरकार के बड़का फैसला — बिलासपुर बनही छत्तीसगढ़ के अगला विकास इंजन: मुख्यमंत्री विष्णुदेव साय के नेतृत्व मा बिलासपुर के विकास के नवा नक्शा तैयार
देस के शहरी विकास मा बिलासपुर ला बड़का जगा देवाये के सुग्घर सुरुआत: केंद्र-राज्य मिलके अब बिलासपुर के विकास ला दीहीं नवा रफ्तार
मुख्यमंत्री श्री विष्णु देव साय ह प्रस्तुत करिस बिलासपुर के 15 साल के विकास विज़न
रायपुर, छत्तीसगढ़ के डबल इंजन सरकार ह आज ये बात साफ कर दीस के अवइया समय मा बिलासपुर राज्य के अगला ‘ग्रोथ इंजन’ (विकास के इंजन) बनइया हे। मंत्रालय महानदी भवन मा मुख्यमंत्री श्री विष्णु देव साय के अगुवाई मा होय एक बड़का अउ उच्चस्तरीय बैठक ह बिलासपुर के चौमुखी विकास बर एक बड़का अभियान के रूप ले लेहे हे। ये बैठक मा जइसे केंद्र अउ राज्य के बड़े-बड़े नेता मन जुरियाइन, ओखर ले ये साबित हो गे के बिलासपुर के विकास अब सिरिफ स्थानीय मुद्दा नइये, बल्कि छत्तीसगढ़ सरकार के पहली प्राथमिकता बन गे हे।
बैठक मा केंद्रीय राज्य मंत्री श्री तोखन साहू, उप मुख्यमंत्री श्री अरुण साव, वित्त मंत्री श्री ओ.पी. चौधरी, विधायक श्री अमर अग्रवाल, विधायक श्री सुशांत शुक्ला, विधायक श्री धरमलाल कौशिक, महापौर श्रीमती पूजा विधानी, मुख्य सचिव श्री विकास शील, मुख्यमंत्री के प्रमुख सचिव श्री सुबोध कुमार सिंह अउ अलग-अलग विभाग के सचिव अउ बड़का अधिकारी मन सब एक के मंच मा उपस्थित रिहिन। ये सब झन के एक संघरा होना ये बतावत हे के बिलासपुर के विकास बर अब दिल्ली अउ रायपुर मिलके काम करही। योजना मन ला मंजूरी देहे, पइसा-कौड़ी के बेवस्था करे अउ काम ला तेजी से पूरा करे बर सरकार के नीयत अब साफ़ दिखत हे।
मुख्यमंत्री श्री विष्णुदेव साय ह बैठक मा बिलासपुर के अवइया 10-15 साल के शहरी विकास के पूरा खाका (रोडमैप) खुद आघू रखिन। उमन सिरिफ आज के समस्या ऊपर गोठ बात नई करिन, बल्कि आघू बढ़त आबादी, शहर के फइलाव, ट्रैफिक, आवास, पानी, सीवरेज, ड्रेनेज अउ पूरा शहर के बसाहट (टाउन प्लानिंग) ऊपर विस्तार से चर्चा करिन। मुख्यमंत्री जी ह साफ़ कहिन के “नाली ले लेके नगर नियोजन तक” कोनो भी विषय ला चर्चा ले बाहिर नई छोड़े गे हे। एखर ले ये समझ मा आथे के सरकार सिरिफ घोषणा नई करत हे, बल्कि जमीनी स्तर पे काम करे बर पक्का योजना बनावत हे।
मुख्यमंत्री ह येहु संकेत दीन के बिलासपुर ला सिरिफ एक ठन बड़का शहर न ही, भलुक छत्तीसगढ़ के नवा आर्थिक, शिक्षा अउ स्वास्थ्य के गढ़ (हब) बनाय जाही। लॉजिस्टिक सपोर्ट, इंफ्रास्ट्रक्चर, कनेक्टिविटी अउ निवेश के नवा मौका के संग बिलासपुर ला मध्य भारत के प्रमुख शहर बनाय के लक्ष्य रखे गे हे। आवत साल मन मा बिलासपुर ला “मॉडल सिटी” के रूप मा विकसित करे जाही, जिहां आधुनिक सुविधा, साफ़-सफाई अउ रोजगार के नवा अवसर मिलही। एखर से न केवल बिलासपुर, बल्कि पूरा उत्तर छत्तीसगढ़ ला फायदा मिलही।
बैठक मा जनप्रतिनिधि मन के भागीदारी ह “सबका साथ” के संदेश दीस। विधायक, महापौर अउ बाकी नेता मन के उपस्थिति ह बता दीस के बिलासपुर के विकास शहर के भविष्य बर सब के मिलजुल के संकल्प हे। वित्त मंत्री श्री ओ.पी. चौधरी ह कहिन के बिलासपुर के विकास बर पइसा के कोनो कमी नई होवन देन।
केंद्र-राज्य के तालमेल के ये मॉडल ह सिद्ध कर दीस के छत्तीसगढ़ के शहरी विकास योजना अब सीधा राष्ट्रीय मिशन ले जुड़ गे हे। स्मार्ट सिटी, अमृत मिशन, हाउसिंग अउ ट्रांसपोर्ट जइसे योजना मा अब तेजी आही।
बैठक मा बताय गीस के बिलासपुर अवइया समय मा छत्तीसगढ़ के अगला ग्रोथ इंजन बनही। उद्योग, रोजगार, रियल एस्टेट, शिक्षा अउ स्वास्थ्य सेवा के विस्तार ले इहाँ विकास के नवा लहर अवइया हे। मुख्यमंत्री के नेतृत्व मा बिलासपुर के विकास अब एक मजबूत राजनीतिक संकल्प बन चुके हे अउ डबल इंजन सरकार के ताकत के संग बिलासपुर अब देस के नक्शा मा अपन अलग पहचान बनाय बर तेजी ले आघू बढ़त हे।
