बिलासपुर, मुख्यमंत्री श्री भूपेश बघेल ह कहिन हे कि बिलासपुर शहर के समुचित विकास करे जाही। इहां मूलभूत सुविधा मन के सबो काम होही, ए काम मन बर धन के कोनो कमी नइ होवय। ओ मन आज नगर निगम बिलासपुर के नवनिर्वाचित महापौर अउर सभापति के शपथ ग्रहण समारोह ल सम्बोधित करत रहिन। ये बेरा म नगरीय प्रशासन अउर विकास मंत्री डॉ. शिवकुमार डहरिया अउर विधायक श्री मोहन मरकाम विशेष रूप ले उपस्थित रहिन।
मुख्यमंत्री श्री बघेल ह कहिन कि बड़े-बड़े पुल-पुलिया, बिल्डिंग बनाए ले ही विकास नइ होवय, भलुक मनखे बर भरपूर भोजन, स्वास्थ्य खराब होए म बेहतर इलाज, शिक्षा अऊ रोजगार के व्यवस्था होनी चाही, ये काम सरकार के प्राथमिकता म सामिल हे। उमन कहिन कि नगर म सबो निर्माण, विकास अउर नागरिक सुविधा मन के काम गुणवत्तापूर्ण होना चाहिये। आम नागरिक मन ल कोनो दिक्कत झन होवय, सबके काम आसानी ले होवय, साफ-सफाई के बेहतर व्यवस्था अऊ पेयजल के बेहतर व्यवस्था के संग कई ठन काम करे जाही। उमन कहिन कि बिलासपुर के जीवनदायिनी अरपा नदी म बारों महीना पानी रहय, ये हमर संकल्प हे। पानी होही त अरपा के आशीर्वाद घलोक हमला मिलही।
मुख्यमंत्री ह लइका मन के संग खेलिन पिठ्ठुल, बांटी
मुख्यमंत्री श्री भूपेश बघेल जइसेच समारोह स्थल म पहुंचिन अचानक ओ मन मंच म जाय के बजाय सीधा ओ जगा म चल दीन, जिहां छेरछेरा पर्व के अवसर म स्कूली लइका मन उछाह अउर उमंग के संग पारंपरिक खेल मन के आनंद लेत नाचत-गात रहिन। मुख्यमंत्री ह लइका मन के संग पिठ्ठुल खेलिन अउ बाटी ले निशाना लगाइन अऊ फुगड़ी, बिल्लस खेलत बालिका मन के उत्साहवर्धन करिन। मुख्यमंत्री ल अपन बीच पाके लइका मन के उछाह दुगुना हो गीस। मुख्यमंत्री ह बालिका मन ल अन्नदान करके छेरछेरा के रस्म अदा करिन।
मुख्यमंत्री ह लइका मन अऊ नागरिक मन ल छेरछेरा पर्व के बधाई देवत कहिन कि ये एक अइसन तिहार ये जऊन ल नौजवान, सियान, नोनी सब अलग-अलग टोली म निकलके मनखे मन के घर ले अन्नदान लेथे। ये तिहार के माध्यम ले धन के संग्रहण करके ओला सामाजिक काम म खर्च करे के परंपरा हे। उमन छेरछेरा पर्व के संबंध म प्राचीन मान्यता मन के घलोक जिक्र करिन।
कार्यक्रम ल नगरीय प्रशासन मंत्री डॉ. शिव डहरिया, विधायक श्री मोहन मरकाम, बिलासपुर विधायक श्री शैलेष पाण्डेय, तखतपुर विधायक श्रीमती रश्मि सिंह, श्री अटल श्रीवास्तव ह घलोक संबोधित करिस। समारोह म नवनिर्वाचित महापौर श्री रामशरण यादव अऊ सभापति श्री शेख नजीरूद्दीन ल कलेक्टर डॉ.संजय अलंग ह शपथ देवाइन। ये मौका म बहुत अकन जनप्रतिनिधि अऊ बड़ी संख्या म आम नागरिक उपस्थित रहिन।
