बिलासपुर, बिलासपुर म आज ले गढ़बो नवा छत्तीसगढ़ के थीम उपर आधारित दू दिवसीय जिला स्तरीय युवा महोत्सव सुरू होइस। जेमां पूरा जिला भर ले आये युवा मन उछाह ले भागीदारी करत हें। आज युवा मन ह जमके भौंरा खेलिन अऊ गेंड़ी चलाईन। संगेच चित्रकला, निबंध, वाद-विवाद अऊ तात्कालिक भाषण जइसे प्रतियोगिता मन म अपन प्रतिभा के बढ़-चढ़के प्रदर्शन करिन।
बहतराई स्टेडियम म चलत युवा महोत्सव के पहिली दिन एकल प्रतियोगिता आयोजित करे गइस। जेमां तात्कालिक भाषण, वाद-विवाद, चित्रकला, निबंध, गेंड़ी, भौंरा, शास्त्रीय गायन, वादन अऊ नृत्य के विधा मन म जिला के 7 विकासखंड मन ले चुने गए करीबन 200 युवा मन ह भाग लीन। हरेक विकासखंड म आयोजित युवा महोत्सव म अपन श्रेष्ठ प्रदर्शन करइया युवा मन ल जिला स्तरीय प्रतियोगिता म भाग लेहे के मौका मिलीस। महोत्सव म फूड फेस्टिवल घलोक आयोजित करे गीस। जिहां रंग-संग के स्वादिष्ट व्यंजन मन के खूशबू मनखे मन ल लुभावत रहिस। व्यंजन प्रतियोगिता म घलोक युवा मन ह बढ़-चढ़के हिस्सा लीन। काल महोत्सव के आखरी दिन लोकनृत्य, लोकगीत, पारंपरिक वेश-भूषा के प्रतियोगिता होही। जेमां करीबन 300 भाग लेवइया सामिल होहीं।