बिलासपुर तीन लाख ले दस लाख जनसंख्या श्रेणी म देश के दूसरा अऊ कुम्हारी 20-50 हजार के आबादी वाले शहर मन म देश के तीसरा सबले साफ शहर
सुपर स्वच्छता लीग म छत्तीसगढ़ के तीन शहर मन ह बनाइस जगा, रायपुर राज्य के प्रॉमिसिंग स्वच्छ शहर
मुख्यमंत्री श्री विष्णु देव साय अऊ उप मुख्यमंत्री श्री अरुण साव ह राष्ट्रीय स्तर म पुरस्कृत नगरीय निकाय मन ल दीन बधाई
रायपुर, केन्द्रीय आवास अऊ शहरी कार्य मंत्रालय के स्वच्छ सर्वेक्षण 2024-25 म छत्तीसगढ़ के सात शहर मन ह अपन स्वच्छता के चमक बगराए हें। बिल्हा नगर पंचायत 20 हजार ले कम आबादी वाले शहर मन म अब देश के सबसे साफ-सुथरा शहर बन गीस हे। स्वच्छ सर्वेक्षण म 20 हजार ले कम आबादी वाले शहर मन के श्रेणी म बिल्हा ह देशभर म पहिली जगा पाए हे। तीन लाख ले दस लाख जनसंख्या वाले शहर मन म बिलासपुर ल पूरा देश म दूसरा अऊ 20 हजार ले 50 हजार आबादी वाले शहर मन म कुम्हारी ल तीसरा जगा मिले हे।
राष्ट्रपति श्रीमती द्रौपदी मुर्मु ह आज नई दिल्ली के विज्ञान भवन म आयोजित भव्य समारोह म ए तीनों नगरीय निकाय मन के संग स्वच्छ सर्वेक्षण म उत्कृष्ट प्रदर्शन करइया राज्य के कुल सात नगरीय निकाय मन ल इनाम दीन। उप मुख्यमंत्री अऊ नगरीय प्रशासन अऊ विकास मंत्री श्री अरुण साव, संबंधित निकाय मन के महापौर, अध्यक्ष अऊ अधिकारी मन ह ये पुरस्कार झोंकिन। केन्द्रीय अवास अऊ शहरी कार्य मंत्री श्री मनोहर लाल अऊ केन्द्रीय आवास अऊ शहरी कार्य राज्य मंत्री श्री तोखन साहू घलोक पुरस्कार समारोह म सामिल होइन।
भारत सरकार के स्वच्छ सर्वेक्षण 2024-25 म अंबिकापुर, पाटन, विश्रामपुर अऊ रायपुर ह घलोक राष्ट्रीय स्तर म छत्तीसगढ़ के मान बढ़ाए हे। स्वच्छ सर्वेक्षण म पहली पइत सामिल नवा श्रेणी ‘स्वच्छता सुपर लीग’ (एसएसएल) म अंबिकापुर, पाटन अऊ विश्रामपुर ह जगा बनाय हे। ये सम्मान वो शहर मन ल देहे गीस, जेन पाछू तीन बछर म कम से कम एक पइत शीर्ष तीन म रहे हें अऊ अभी हाल साल म शीर्ष 20 शहर मन म सामिल हे। अंबिकापुर ह 50 हजार ले तीन लाख जनसंख्या श्रेणी म अऊ पाटन अऊ विश्रामपुर ह 20 हजार ले कम आबादी वाले शहर मन के श्रेणी म एसएसएल म अपन जगा ठउका करे हे। एकर अलावा, राजधानी रायपुर ल छत्तीसगढ़ के ‘प्रॉमिसिंग (Promising) स्वच्छ शहर’ के पुरस्कार मिले हे।
मुख्यमंत्री श्री विष्णु देव साय ह सबो विजेता नगरीय निकाय मन ल बधाई देवत कहिन के ये उपलब्धि राज्य के बर गरब के बेरा हे। उमन ए शहर मन म स्वच्छता के प्रति नागरिक मन, स्थानीय निकाय मन अऊ प्रशासन के सामूहिक उदीम ल सहरावत कहिन के ये पुरस्कार राज्य के आन शहर मन ल घलोक अपन शहर ल सुंदर अऊ स्वच्छ बनाए बर प्रेरित करही।
उप मुख्यमंत्री अऊ नगरीय प्रशासन अऊ विकास मंत्री श्री अरुण साव ह घलोक आज पुरस्कृत नगरीय निकाय मन ल बधाई दीन अऊ कहिन के ये छत्तीसगढ़ के बर केवल एक सम्मान ही न ही, बल्कि स्वच्छता के प्रति सरलग उदीम मन के प्रमाण हे। अवइया समय म आन नगरीय निकाय मन ल घलोक स्वच्छता बर राष्ट्रीय पुरस्कार प्राप्त होही। शहरी सरकार मन ले लेके राज्य अऊ केंद्र के सरकार तक शहर मन ल स्वच्छ, सुंदर अऊ सुविधापूर्ण बनाए खातिर कई नवाचार के संग सरलग काम करत हे।
