रायपुर, 14 जनवरी 2021। राज्य के बालोद जिला लेे जांच बर भेजे गए कुक्कुट (चिकन) सैम्पल के रिपोर्ट पॉजिटिव आये हे। राष्ट्रीय उच्च सुरक्षा पशु रोग संस्थान भोपाल ले गुरुवार संझा प्राप्त रिपोर्ट म ये बात के पुष्टि होय हे। राष्ट्रीय उच्च सुरक्षा पशु रोग संस्थान ह एखर सूचना छत्तीसगढ़ राज्य के मुख्य सचिव सहित संचालक पशु चिकित्सा सेवाएं ल दीन हे। राज्य म बर्ड-फ्लू के ये पहली मामला हे जोन बालोद जिला म मिले हे। बालोद जिला स्थित जी.एस. पोल्ट्री फार्म गिधाली म कुक्कुट (चिकन) के 5 सेम्पल बीते 11 जनवरी के जांच बर राष्ट्रीय उच्च सुरक्षा पशु रोग संस्थान भोपाल भेजे गए रहिस। जांच म पांचों सेम्पल एच-5 एन-8 एविएन इनफ्लुएंजा वायरस ले ग्रसित पाए गीस। सैम्पल के ट्रेकियल स्वाब अउ क्लोकल स्वाब के रिपोर्ट घलो पॉजिटिव पाये गए हे। एला लेके राज्य के सबो जिला मन ल हाई अलर्ट कर देहे गए हे।
संचालक पशु चिकित्सक ह बतइन कि भारत सरकार के डाहर ले देहे गए निर्देश के अनुसार संक्रमित फार्म ले एक किलोमीटर परिधि क्षेत्र ल संक्रमित क्षेत्र घोषित करके रैपिड रिस्पांस टीम (आरआरटी) द्वारा आवश्यक कार्रवाई करे जावत हे। संक्रमित क्षेत्र म कुक्कुट पक्षी मन के आवागमन पूर्णतः प्रतिबंधित करे जावत हे। एखर संग ही मनुष्य अउ वाहन मन के आवागमन ल घलो सीमित करे के कार्रवाई करे जावत हे। बालोद के जीएस पोल्ट्री फार्म गिधाली के एक किलोमीटर ले 10 किलोमीटर परिधि क्षेत्र ल निगरानी क्षेत्र घोषित करे जावत हे।
