मुख्यमंत्री ह आदिवासी जननायक श्री बिरसा मुण्डा के पुण्यतिथि म ओ मन ल करिन नमन

रायपुर 8 जून 2020/ मुख्यमंत्री श्री भूपेश बघेल ह आदिवासी मन के उत्थान बर आजीवन संघर्ष करइया महान क्रांतिकारी जननायक श्री बिरसा मुण्डा ल उंखर पुण्यतिथि 9 जून के अवसर म अपन श्रद्धांजलि अर्पित करे हें। मुख्यमंत्री ह श्री मुण्डा ल नमन करत कहिन के श्री मुण्डा आदिवासी चेतना के प्रणेता मन म ले एक रहिन। उमन आदिवासी मन ल सकेल के जल, जंगल अऊ जमीन बर आंदोलन करिस। अकाल पीड़ित मन के मदद करिन। ऊंखर शौर्य अऊ बलिदान के गाथा आज घलोक करोड़ों मनखे मन ल प्रेरित करथे। मुख्यमंत्री ह कहिन के श्री बिरसा मुण्डा ह हमला सिखाइस के प्रेरणादायी नेतृत्व होए म सामूहिक इच्छाशक्ति, हथियार मन के शक्ति म घलोक भारी परथे। ओखर अदम्य साहस हम सब बर प्रेरणा स्रोत हे। श्री बघेल ह कहिन के आदिवासी मन ल ओखर अधिकार अऊ स्वाभिमान दिलाना ही बिरसा मुंडा जी ल सच्ची श्रद्धांजलि होही।