रायपुर, 23 जुलाई 2020। मुख्यमंत्री श्री भूपेश बघेल ह महान स्वतंत्रता संग्राम सेनानी स्वर्गीय श्री बिसाहू दास महन्त के पुण्यतिथि म ऊंखर फोटू म माल्यार्पण करके ओ मन ल विनम्र श्रद्धांजलि अर्पित करिन। श्री बघेल ह अपन निवास कार्यालय म स्वर्गीय श्री महंत ल श्रद्धा सुमन अर्पित करिन।
मुख्यमंत्री ह श्री महन्त ल श्रद्धांजलि अर्पित करत कहिन के उंखर पूरा जीवन जनसेवा ले जुड़े रहिस। स्वतंत्रता संग्राम सेनानी के संगें-संग सफल राजनेता के रूप म उंखर छबि रहे हे। श्री महन्त ह अविभाजित मध्यप्रदेश म विधायक अऊ मंत्री के रूप म प्रदेश के विकास बर अपन अमूल्य सेवा देहे हें। उमन क्षेत्र म खेती-किसानी, सिंचाई अऊ सड़क के माध्यम ले मनखे मन के बेहतरी के काम मन ल बखूबी अंजाम दीन। मुख्यमंत्री श्री बघेल ह कहिन के स्वर्गीय श्री महन्त के बताये जनकल्याण के रद्दा म चलके प्रदेश म विकास ल नवा आयाम देहे के दिशा म काम करे जात हे।
ये बेरा म वरिष्ठ विधायक श्री सत्यनारायण शर्मा, संसदीय सचिव श्री विकास उपाध्याय अऊ श्री शिशुपाल सोरी, छत्तीसगढ़ राज्य पाठ्य-पुस्तक निगम के अध्यक्ष श्री शैलेष नितिन त्रिवेदी, छत्तीसगढ़ राज्य खनिज विकास निगम के अध्यक्ष श्री गिरीश देवांगन, छत्तीसगढ़ राज्य खाद्य अउ नागरिक आपूर्ति निगम के अध्यक्ष श्री रामगोपाल अग्रवाल, छत्तीसगढ़ राज्य गृह निर्माण मंडल के अध्यक्ष श्री कुलदीप जुनेजा, रायपुर विकास प्राधिकरण के अध्यक्ष श्री सुभाष धुप्पड़, मुख्यमंत्री के सलाहकार श्री विनोद वर्मा अऊ श्री राजेश तिवारी, महापौर श्री एजाज ढेबर अऊ सभापति श्री प्रमोद दुबे घलोक उपस्थित रहिन।
