कांकेर, 05 मार्च 2020। आधुनिक पद्धति ले लाभकारी फसल के खेती करके किसान नवा इबारत लिखत हे। खेती म नवा तकनीक के प्रयोग करके कांकेर जिला के चारामा विकासखण्ड के ग्राम परसोदा के किसान श्री बिसेश्वर साहू ह पदर साल मात्र ड़ेढ एकड़ म पताल के खेती करके चार लाख रूपिया के आमदनी पाए हे। एखर सेग वो ह अकतहा मात्र 40 डिस्मिल म भांटा के खेती करके अब तक 50 हजार रूपिया के भांटा बेच दरे हे। अभी घलोक वोला अपन खेत मन म लगे भांटा के ब्रिकी ले बनेच आमदनी के भरोसा हे। आधुनिक खेती ल अपनाके श्री बिसेश्वर खुद आत्म निर्भर बन गे हे, संगेच अपन गांव के 10 आन मनखे मन ल घलोक रोजेच रोजगार देवत हे।
कृषि अउ उद्यानिकी विभाग के अधिकारी मन ह बताइस कि अंचल के किसान मन कोति ले आधुनिक पद्धति ले नकदी फसल मन जइसे- साग-सब्जी, मक्का आदि के खेती करे जात हे। ग्राम परसोदा के किसान बिसेश्वर साहू ह टपक सिंचाई पद्धति संग प्लास्टिक मल्चिंग ले कलिंदर, बैगन, टमाटर, फुलगोभी, पत्तागोभी, करेला आदि के खेती करत हे। श्री बिसेश्वर साहू ह बताइस कि आधुनिक पद्धति ले पानी के बचत होथे, लागत कम आथे अऊ आमदनी घलोक जादा होथे। वो ह बताइस के पउर साल ड़ेढ एकड़ म टमाटर के खेती करे रहिस, जेखर से 04 लाख के फायदा होइस, ये साल मात्र 40 डिस्मिल म बैगन के खेती ले अब तक 50 हजार रूपिया के फायदा हो गए हे। वो ह दो एकड़ म पत्तागोभी अउ फुलगोभी, चार एकड़ म कलिंदर (तरबूज), ड़ेढ एकड़ म टमाटर, एक एकड़ म करेला अऊ 40 डिस्मिल म बैगन के खेती करत हे। श्री बिसेश्वर साहू के बताती चार एकड़ म लेगे कलिंदर के खेती म 40 ले 50 टन उत्पादन होए के अनुमान हे। जिला के कलेक्टर श्री के.एल. चौहान ह श्री बिसेश्वर के आधुनिक खेती ल सहरावत आन किसान मन ल घलोक आधुनिक खेती करे बर प्रोत्साहित करे बर ऊंखर खेत के भ्रमण कराए के हुकुम अधिकारी मन ल दिए हें।
