उल्टी-दस्त प्रभावित गांव बोड़ेगांव म स्थिति नियंत्रण म

दुर्ग, 16 मई 2024/ ग्राम बोड़ेगांव (ननकट्ठी) म उल्टी-दस्त के आऊटब्रेक के सूचना मिले म 15 मई 2024 ले सरलग चेतलगहा काम करे जात हे। जिला मुख्यालय ले 16 मई 2024 के डॉ. जे.पी. मेश्राम, मुख्य चिकित्सा अउ स्वास्थ्य अधिकारी, दुर्ग के संग डॉ. एस.के. मेश्राम, जिला स्वास्थ्य अउ परिवार कल्याण अधिकारी दुर्ग, डॉ. सी.बी.एस. बंजारे, जिला सर्विलेंस अधिकारी, दुर्ग श्रीमती रितीका मसीह, जिला एपिडेमियोलॉजिस्ट, श्री राजेन्द्र वर्मा, विकासखंड कार्यक्रम प्रबंधक, निकुम, श्री संदीप वर्मा, आर.एम.ए., श्री टेमेन्द्र देशमुख अउ सुश्री महेश्वरी बघेल, आरएच. ओ. सुपरवाईजर अउ स्वास्थ्य कार्यकर्ता संग काम्बेट टीम के आन सदस्य मन ह संक्रमित क्षेत्र के दौरा करे रहिन। 16 मई 2024 के ओ संक्रमित क्षेत्र म उल्टी-दस्त के 07 नवा मरीज मिले रहिन जिन ल दस्त के शिकायत हे। 02 डायरिया अउ दस्त के मरीज ल उपचार बर प्राथमिक स्वास्थ्य केन्द्र ननकट्ठी रिफर करे गीस। एमा एक पुरूष 50 साल अउ एक महिला 38 साल ल चिकित्सकीय उपचार देहे जात हे। 01 महिला 42 साल जेकर श्री शंकराचार्य मेडिकल कॉलेज, जुनवानी म चिकित्सकीय उपचार होवत हे, वोखर स्थिति सामान्य हे। 14 मई 2024 ले आज दिनाँक तक ग्राम बोड़ेगांव म कुल 47 प्रकरण म 03 मरीज मन अस्पताल म चिकित्सकीय उपचार लेवत हें अउ आन 44 मरीज मन के घर म चिकित्सकीय उपचार चलत हे, अउ स्वास्थ्य लाभ लेवत हें। काम्बेट टीम अउ मितानिन ह संक्रमित क्षेत्र के सर्वे करत हे। मितानिन अउ स्वास्थ्य कार्यकर्ता ल प्रभावित क्षेत्र म सतत् निगरानी करे के हुकुम देहे गए हे अउ 24×7 स्वास्थ्य केन्द्र म ड्यूटी लगाए गये हे। अभी हाल मे उल्टी-दस्त के प्रभावित क्षेत्र म स्थिति नियंत्रण म हे।